Жиында партиялықтар алдағы президент сайлауына үміткер ретінде ЖСДП елордалық филиалының басшысы Нұрлан Әуесбаевтың кандидатурасын қолдады. Нақтырақ айтсақ, партия съезіне қатысқан 49-делегаттың 48-і Н.Әуесбаевтың кандидатурасын қолдаған.
«Съезд Нұрлан Сатыбалдыұлы Әуесбаевты Жалпыұлттық социал-демократиялық партиясынан президенттікке кандидат етіп сайлау туралы шешім қабылдады», деді партия төрағасы Асхат Рахымжанов.
Нұрлан Әуесбаев 1957 жылы туған. Түркістан облысының тумасы, Астана тұрғыны. Жоғары білімі бар, М.Әуезов атындағы Оңтүстік Қазақстан мемлекеттік университетін бітірген, ұзақ уақыт Жергілікті атқарушы органдарда жауапты лауазымдарда жұмыс істеген.
Партия съезінде Н.Әуесбаевтан бөлек тағы төрт адамның кандидатурасы талқыға түскен. Олардың қатарында, оппозициялық саясаткер Жасарал Қуанышалин мен бұрынғы сенатор Уәлихан Қайсаров та бар. Алайда съезд делегаттары екі саясаткердің де партияға ешқандай қатысы жоқ екенін алға тартып, кандидатураларын қолдаудан бас тартты. ЖСДП-ның Павлодар облысындағы бөлімшесінің төрағасы Ажар Сағындықованың айтуынша, кезектен тыс президент сайлауы жариялана салысымен бұл адамдар әлеуметтік желідегі жеке парақшаларында мәлімдеме жасап, кез келген республикалық қоғамдық бірлестіктер мен партиялардың атынан кандидатураларын ұсынуға дайын екенін мәлімдеген. «Алайда саяси додаға қай партияның артынан, не үшін түсетінін айтқан жоқ», дейді А.Сағындықова.
Ал съезде сөйлеген сөзінде президенттіктен үміткер Н.Әуесбаев қоғамды өзгерту үшін ең алдымен әр адам мемлекет алдындағы жауапкершілігін сезініп, өзгерісті өзінен бастауы керек екенін айтты.
Айта кетейік, Жалпыұлттық социал-демократиялық партиясы елімізде осы уақытқа дейін өткен саяси науқандар кезінде мұндай белсенділік танытпаған болатын. «Алдағы кезектен тыс сайлауға қатысуға не түрткі болды?», «Бұл сайлаудың ерекшелігі неде?» деген сұрақтарға партияның белсенді мүшесі Тазабек Сәмбетбай: «Бұрын елімізде суперпрезиденттік жүйе болғанын бәріміз білеміз. Қазір Қазақстанда шынайы бәсекеге аз да болса жол ашылды. Әлемдегі сан құбылған геосаяси жағдайға бәріміз куә болып отырмыз. Осындай сындарлы сәтте еліміздің маңызды саяси науқанынан шет қалмау қажет. Себебі президент сайлауы – тұтас елдің тағдырына жауапты кезең», деп жауап берді. Партияның Алматы қалалық бөлімшесінің басшысы Т.Сәмбетбайдың айтуынша, қазір бүкіл қоғам, Қазақстан үлкен өзгерістерді басынан өткеруде.
2007 жылы ресми тіркелген Жалпыұлттық социал-демократиялық партиясы 2015 және 2019 жылы өткен президент сайлауларына бойкот жариялаған еді. Саяси ұйым 2021 жылы өткен парламент сайлауына да қатысқан жоқ.