Жерлесіміз жүлде қоры 611 210 еуроны құрайтын жарыстың алғашқы айналымында әлемнің 17-ракеткасы америкалық Мэдисон Кизбен шеберлік байқасты. Биылдыққа екі теннисші осымен үшінші мәрте бір-бірімен кездесті. «Ролан Гарростың» екінші айналымында өткен бірінші матчта америкалық теннисші 3:6, 6:1, 7:6 есебімен жеңіске жетті. Кейіннен араға үш ай салып олар АҚШ-тың Цинциннати қаласындағы WTA турнирінде бақ сынасты. Өкінішке қарай, бұл жолы да Киздің мерейі үстем болды – 6:2, 6:4.
Ал күні кеше өткен екі теннисшінің арасындағы үшінші бәсеке жерлесіміздің пайдасына аяқталды. Бірінші сетте америкалық теннисші 7:5 есебімен басым түскенімен, кейінгі екі сетте Е. Рыбакина ойын тізгінін өз қолына алып, 6:3, 6:3 нәтижесімен қарсыласын тізе бүктірді.
Е.Рыбакина келесі кезеңде әлемнің 16-ракеткасы латвиялық Елена Остапенко немесе әлемдік рейтингте 31-сатыда тұрған Беларусь өкілі Александра Сасновичтің бірімен ойнайды.
