Соның ішінде Қарағанды облысының транзиттік әлеуетін арттыруға арналған тапсырмалары, көлік коммуникациясын дамытуға байланысты міндеттері мен межелері тұщымды.
Баршаға мәлім, Қарағанды облысы территориясы ауқымды, еліміздегі үлкен облыс. Өңір транзиттік жолдар тоғысында тұр. Сол себепті де жолдардың жағдайы халықты қатты алаңдатады. Әсіресе қасиетті Қарқаралы, мыс мекені Жезқазған жолының сапасы сын көтермейді. Аталған жолдарға Президенттің назар аударуы ондағы күрделі де күрмеулі мәселені шешпек. Тіпті Үкіметке Қарағанды-Қарқаралы тас жолын екі жыл ішінде салу туралы тапсырмасы аймақ экономикасын ілгерілетуге әсер етері даусыз.
Біз расымен өңірлік туризмді дамытамыз десек, ең алдымен көлік жолдарының жөнделуіне баса мән бергеніміз жөн. Себебі бұл мәселенің оң шешілуі аймақ экономикасының өсуіне септігін тигізеді. Сонымен қатар Президенттің ірі кәсіпорындардың мемлекет алдындағы жауапкершілігін күшейту туралы сөзі бұқараның көкейінен шыққаны даусыз. Осы бағытта ел Президентінің «Қуатты өңірлер – ел дамуының драйвері» деген ұстанымы өте дұрыс.
Сондай-ақ ғалым ретінде, оқу орнында ұзақ жылдар еңбек еткен ұстаз ретінде маған Мемлекет басшысының өңірлік университетті дамыту туралы бастамасы ұнады. Оқу орындарының жанынан зертханалар ашуға қамқорлық танытуы да қуанарлық жаңалық. Мұндай кездесулер Президент пен халық арасындағы байланысты нығайта түседі.
Нұрлан ДУЛАТБЕКОВ,
Е.А.Бөкетов университетінің ректоры, академик