Amanat партиясы Алматы қалалық филиалы атқарушы хатшысының орынбасары Қайрат Бисембаев тұғырнамада Қазақстанның басты қоғамдық күшінің болашаққа деген көзқарасы, даму бағдарлары, ұстанымдары мен саяси мақсаттары қамтылғанын атап өтті. Оның айтуынша, партияның жаңа идеологиялық құжаты адамның, қоғам мен мемлекеттің үйлесімді дамуы, олардың өзара қарым-қатынасы принципіне құрылған.
Ал Алматы қалалық мәслихатындағы Amanat-тың депутаты Бекбол Рамазан тұғырнаманың «Азаматтық қоғам – дамудың кепілі» тарауына ерекше тоқталды. «Осы тарауда «Жастар – ел болашағы. Біз белсенді азаматтық ұстанымы бар жаңаша ойлайтын жастардың тың идеяларын әрқашан қолдаймыз» делінеді. Тұғырнамада өскелең ұрпақ мәселесіне айрықша мән беріліп отырғанына өз басым ерекше қуанып отырмын», деді депутат.
Бұл ретте кеңес мүшесі, Ұлттық ғылым академиясының академигі Ханкелді Әбжанов маңызды құжатта көрініс тапқан ұлт саулығы мәселесіне мән берді. «Елімізде дәрігер маманның тапшылығын көріп отырған елді мекендер бар. Кемі 500 адам тұрып жатқан ауылдық жерлерде міндетті түрде дәрігер болуы керек», деді академик.
Өз кезегінде, кеңес төрағасы Қарагөз Сүлейменова жаңа саяси тұғырнама партия мүшелері, сарапшылар, ғылыми және шығармашылық зиялы қауым өкілдері, белсенді азаматтар бірлесе талқылаған пікірталастың нәтижесінде пайда болғанын жеткізді.
«Партия әрқашан қоғамдық-саяси процестердің бел ортасынан табылады. Мұнда түрлі пікір мен көзқарасқа орын бар. Сондықтан тұғырнаманы әзірлеген жұмыс тобы партия мүшелері жолдаған мыңнан астам ұсынысты назарға алды», деп Қарагөз Сүлейменова отырысты қорытындылады.
