Бір ғана Талас ауданында бүгінгі таңда үш бірдей жел электр стансасының құрылысы қарқынды түрде жүргізіліп жатыр. Аталған нысандардың құрылыс жұмыстарын «Шеңгелді», «Шеңгелді-2», «Новатэкс» секілді серіктестіктер сәтімен жүзеге асырып келеді.
Стансалар құрылысы Қызыләуіт ауылдық округінде жүргізіліп жатыр. Округте бұған дейін екі бірдей жел электр стансасы салынған. Жалпы қуаты 4,5 мегаватқа жетіп жығылатын алғашқы жел электр стансасының құрылысын «Шеңгелді» ЖШС осыдан екі жыл уақыт бұрын қолға алған. Жобаның жалпы құны – 1 млрд 829,1 млн теңге. Нысанның құрылыс жұмыстарын сапалы жүргізу мақсатында 11 адам жұмыспен қамтылған. Қазірге дейін мұнда үш бірдей қондырғы орнатылды. Алдағы уақытта өзге де жұмыстар атқарылмақ. Мердігер серіктестік стансаның жұмысын жыл соңына дейін аяқтауға ниет білдіріп отыр. Маңызды нысанның құрылыс жұмыстары межелі уақытта аяқталса, жыл соңында іске қосылмақ.
«Новатэкс» ЖШС қолға алған тағы бір нысанның да қуаты 4,5 мегаватты құрайды. Бүгінге дейін аталған стансадағы жұмыстардың бір парасы аяқталуға жақын тұр. Қондырғылар толықтай орнатылып, ішкі жұмыстар жүзеге асырылып жатыр. Аудан әкімдігінің баспасөз қызметі таратқан дерекке зер салсақ, жел электр стансасын осы жылы толық аяқтау көзделген.
«Шеңгелді-2» ЖШС құрылысын жүргізіп жатқан стансада бірқатар қажетті қондырғылар дер кезінде орнатылған көрінеді. Сондай-ақ жел электр стансасына қажетті құрал-жабдықтар Дания елінен әкелінді. Жобаның құрылтайшы директоры Жолдыбек Тұралиев маңызды нысандар уақтылы іске қосылса, жергілікті жұртқа пайдасы мол болатынына сенімді.
Талас ауданының кәсіпкерлік, өнеркәсіп және туризм бөлімінің басшысы Ауданбек Тауасаровтың айтуынша, 2022 жылы жалпы қуаты 13,5 мегаватты құрайтын үш станса пайдалануға беріледі.
«Біздің ауданда бірнеше жылдың бедерінде бой көтерген электр стансаларының аудан экономикасын арттыруда маңызы зор. Бүгінге дейін жалпы қуаты 9 мегаватты құрайтын екі станса іске қосылса, осы жылы пайдалануға берілетін жел электр стансаларының қуаты 13,5 мегаваттқа жетеді. Барлығының қуатын қоса есептесек, 22,5 мегаваттқа жетіп отыр. Бұл ауданымыз үшін жақсы көрсеткіш. Алайда тоқмейілсіп қалмай, осы бағыттағы жұмыстарды одан әрмен қарай жандандыра түсуге бейілміз», дейді ол.
Жамбыл облысы,
Талас ауданы
