Экология • 06 Қазан, 2022

EcoStudentKZ: Жастар жұдырықтай жұмылды

193 рет
көрсетілді
3 мин
оқу үшін

М.Х.Дулати атындағы Тараз өңірлік университетінің белсенді жастары республика көлемінде өтіп жатқан EcoStudentKZ челленджін Екібастұз қаласының жастарынан қабыл алып, Тараздың орталық көшесі саналатын Төле би даңғылында орналасқан оқу орнының маңайын қоқыстан тазартты.

EcoStudentKZ: Жастар жұдырықтай жұмылды

Шымкент қаласынан бастау алған челлендж эстафетасы бүгінде еліміздің әр қиырында жалғасын тауып жатыр. Таразда ұйымдастырылған тазалық акциясына жиналған студенттер мен ерікті жастар тотыдай таранған Тараздың тазалығы үшін жергілікті атқарушы би­лік қана емес, тұтас қала халқы жауапты деп есептейді.

«Екі мың жылдан астам тарихы бар Тараз қаласы – біздің мақтанышымыз. Өркениет көшіне ілескен шаһардың бүгінгі келбетіне көз тояды. Еліміздегі ең көрікті жасыл қаланың мұнтаздай таза болуы үшін әкімдік қызметкерлері  немесе жауапты мекеме өкілдері ғана емес, баршамыз жауапты болуға тиіспіз. Өйт­кені Тараз – біздің сүйікті қаламыз», дейді челленджге қатысқан студенттер жүз­дері бал-бұл жанып.

Тараз шаһары бүгінгі таңда бұрын­ғыдай ластанбайды. Біріншіден, адам­дардың санасы өзгерсе, екіншіден, таза­лыққа жауапты мекемелердің жұ­мысы жолға қойылған.

«Бүгінгі таңда облыста барлығы 163 полигон және қоқыс төгуге ар­нал­ған үйінділер жұмыс істеп тұр. Оның 5-і жеке меншікте болса, 158-і ком­муналдық меншікте. Поли­гон­дар­дың барлығы қоршаған ортаға арналған эмиссияға рұқсаты рәсім­делген, санитариялық талаптарға сай. Қалдықтарды жинау, тасымалдау және сұрыптау қызметтерімен айналысатын 43 мекеменің жұмысы үйлестірілген. Олар 191 арнайы техникамен қамтылған. Аудан орталықтарында орналасқан полигондарда қалдықтар негізінен 5 ком­понентке сұрыпталады. Жиналған қатты тұрмыстық қалдықтар тексеруден өткізіліп, шикізат алу үшін қайта өңдеуге жіберіледі», дейді об­лыстық табиғи ресурстар және табиғат пайдалануды реттеу басқармасының басшысы Мұратхан Шүкеев.

Жалпы, өңірде жыл сайын екі мәрте тазалық айлығы жүргізіледі. Екі айға созылатын аталған іс-шараға облыстағы барлық жастар мен мекеме басшылары, қызметкерлер ерікті түрде үн қосады. Содан да болса керек, Тараз қаласының ішкі көрінісі қоқыс атаулыдан кәдімгідей тазарып қалған деуге болады.

EcoStudentKZ челленджі аясында М.Х.Дулати атындағы Тараз өңірлік университетінің айналасын, орталық көшені қоқыстан тазартуға қатысқан сту­денттердің қатары қалың болғаны қуант­ты. Тіпті бұл іске өз еркімен қо­сыл­ған жастарды көргенде дән риза болыстық.

«Экологиялық сананы қалыптастыру мақсатында Шымкент қаласынан бас­тау алған челленджге студенттер өз еркімен қатысып, қолдау білдіріп отыр. Сол үшін де оларға деген алғысымыз шексіз. Жалпы, Тараз қаласының таза болуы үшін әрбір азамат жауап­ты екенін қаперде ұстаған жөн. Жастар бүгін оқу ордасының айналасын ғана емес, кө­шенің де аулаларын тазалап, сауапты іске үн қосып отыр. Алдағы уақытта да мұндай экологиялық ак­ция­лардың өтуіне мұрындық болып, сенбіліктер ұйымдастырамыз. Абат­тан­дыру жұмыстарын да қолға алсақ деген ниетіміз бар», дейді М.Х.Ду­лати атындағы Тараз өңірлік универ­ситеті тәрбие жұмысы бөлімінің қызмет­кері Әлихан Нәрегеев өз ойымен бөлісіп.

Орталық көшедегі бірқатар ауланы, жоғары оқу орнының айналасын тұтастай қоқыстан тазартқан тараздық сту­денттер челленджді әрі қарай Петро­павл және Өскемен қалаларының жастарына жолдады.

 

ТАРАЗ