Дәлірек айтсақ, Мемлекет басшысы Павлодардағы әкем оқыған Абай атындағы гимназияға барған екен. Мектеп ұжымы әзірлеген Рамазан Тоқтаров туралы көрмені тамашалаған Президент: «Рамазан Тоқтаровтың біздің халқымызға өте танымал, көрнекті жазушы екені күмәнсіз. Оны мен білуші едім. Өйткені марқұм әкем кезінде Жазушылар одағында онымен бірге, бір кабинетте отырды. Рамазан Тоқтаров біздің үйімізге келіп, әкеммен дәмдес болған. Екеуі жақсы араласты, бірге жүрді. Сондықтан Рамазан Тоқтаровтың шығармашылығын жақсы білемін. «Абайдың жұмбағы» деген романын ол кісінің еңбектерінің шыңы деп айтуға болады. Рамазан Тоқтаровтың жазу стилі күрделі емес, бірақ бірегей деп айтуға болады, өте ерекше. Рамазан Тоқтаров – өте танымал, аса құрметті жазушы. Біз бәріміз оны мақтан тұтамыз», деп естелік айтыпты. Сондай-ақ мектеп оқушылары Мемлекет басшысына әкемнің «Ертіс мұхитқа құяды» деген кітабын тарту етіпті.
Бұл біз үшін, Рамазан Тоқтаровтың ұрпақтары үшін зор мәртебе, мақтаныш. Сондықтан ерекше естелігімен бөліскен Мемлекет басшысына, мәртебелі мейманның назарына әкеміз туралы көрмені ұсынған мектеп ұжымына шексіз алғысымызды білдіреміз.
Рас, кезінде оқылымды жазушылардың қатарында болған әкемнің өмірден өткен соң назардан тыс қалып қойғанына жүрегіміз ауырып, алаңдаушы едік. Перзенті болған соң кітаптары қайта басылып, туып-өскен топырағы – Павлодар қаласынан бір көшеге аты берілсе екен деп армандайтынбыз. Несін жасырайық, Президенттің Рамазан Тоқтаров туралы айтқан естелігі бізге үлкен үміт сыйлады.
Бақыт РАМАЗАНҚЫЗЫ