«Бәйтерек» сатып алғаннан кейін банк атауы Bereke Bank деп өзгерді. «Бәйтерек» ҰБХ басқарма төрағасының орынбасары Ерсайын Хамитов аталған ребрендингтің банк жұмысына қандай өзгерістер алып келетінін айтты.
«Жақын арада банктің толық ребрендингі және Visa, Master Card халықаралық төлем жүйелерімен қызметті кейіннен қалпына келтірумен, мобильді қосымшалардың жұмысын қалпына келтірумен, SWIFT-кодты ауыстырумен санкциялар тізімінен шығару жоспарланып отыр. Сонымен қатар клиенттік ағындарды, депозиттік және кредиттік база көлемдерін жаңарту бойынша жұмыс жүргізіліп жатыр. Бұл өз кезегінде банктің бұрынғы тұрақтылық деңгейін қалпына келтіруге ықпал етеді», деді.
Оның айтуынша, қазір қаржы институтының SDN тізімінде болуына байланысты банктің қызметі шектелген. Холдинг басшылығының айтуынша, банкті SDN тізімінен шығару мәселесі пысықталып жатыр. Бұл процесс шамамен 1-2 айға дейін созылуы мүмкін.
«Қолданыстағы шектеулерді алып тастағаннан кейін холдинг банкті бәсекелес ортаға беру жөніндегі іс-шараларды өткізуді жоспарлап отыр. Халықаралық қаржы ұйымдары, сондай-ақ басқа да институционалдық инвесторлар банктің әлеуетті сатып алушылары бола алады», деп атап өтті Е.Хамитов.
Дегенмен «Бәйтерек» ҰБХ басшылығы банкті сатып алу үшін қанша шығын жұмсалғанын жария етпеді.
«Бәйтерек елдегі активтердің едәуір көлемін, соның ішінде банктік активтерді табысты басқарады, қажетті құзыреттерге ие және сатып алынған банктің дәстүрлі көшбасшылығын сақтауға бағытталған. Мәміле өзара қолайлы қаржы шарттарында жасалды және барлық қажетті реттеушілік мақұлдауларды алды. Мәміле сондай-ақ еншілес банкті иеленген барлық уақыт ішінде алдыңғы акционердің жинақталған инвестицияларының толық қайтарылуын қамтамасыз етеді», деген жауап берумен ғана шектелді.
Еске салайық, АҚШ Қаржы минисрлігі шетелдік активтерді бақылау басқармасы (OFAC) 11 шілдеде арнайы лицензия шығарып, «Сбербанк» АҚ еншілес банкімен мәміле жасау бойынша мерзімді 2022 жылдың 12 шілдесі мен 2022 жылдың 11 қазаны аралығында белгілеген еді.
