23 қыркүйекте жалауы желбіреген әлем чемпионатының алғашқы айналымына 24 құрама қатысып, алты-алтыдан төрт топқа бөлініп ойнады. Сөйтіп, әр топта үздік нәтиже көрсеткен төрт құрама екінші айналымға жолдама алды. Мәселен, екінші кезеңде А және D тобындағы командалар (Италия, Бразилия, Жапония, Қытай, Бельгия, Нидерланд, Пуэрто-Рико және Аргентина) Е тобына жайғасып, Нидерландта сынға түсті. Ал В мен С-дағы үздіктер (Сербия, АҚШ, Түркия, Польша, Канада, Доминикан Республикасы, Тайланд және Германия) F себетіне түсіп, Польшада шеберлік байқасты.
Екінші айналымның қорытындысы бойынша, тағы да әр топтан үздік шыққан 4 ұжым ширек финалға жолдама алды. Енді олар олимпиадалық жүйе бойынша кім мықтыны анықтайды. Жеңілген құрама жарыс жолынан шығып отырады.
Атап айтар болсақ, Е тобынан ширек финалға Италия (25 ұпай) және Бразилия (23) құрамалары тікелей жолдама алды. Сондай-ақ топтық кезеңнің соңғы тур ойындарына дейін ұпайлары шамалас болған Жапония, Қытай, Бельгия және Нидерланд құрамалары кеше соңғы екі жолдаманы сарапқа салды.
Ал F себетіндегі командалардан қазіргі әлем чемпиондары – Сербия, Олимпиада чемпионы – АҚШ, 2015 жылғы Еуропа ойындарының жеңімпазы – Түркия және Олимпия ойындарының екі дүркін қола жүлдегері – Польша құрамалары ширек финалға шықты.
Өкінішке қарай, әлем чемпионатының алғашқы айналымында АҚШ, Сербия, Германия, Болгария және Канада волейболшыларымен бір топта бақ сынаған Дарко Добресков жаттықтыратын Қазақстанның әйелдер құрамасы барлық ойында қарсыласына жол беріп, соңғы орында қалып қойды. Сөйтіп, биылғы әлем чемпионаты жерлестеріміз үшін алғашқы айналымнан-ақ аяқталды. Волейболдан әйелдер арасындағы әлем чемпионаты 15 қазанда мәресіне жетеді.
