«Қорғас – шығыс қақпасы» арнайы экономикалық аймағы құрамындағы 129 гектар аумаққа салынған «Құрғақ порт» айлағының еліміздің экономикалық дамуы мен халықаралық транзиттік әлеуетінің артуында алар орны ерекше. Бұл жоба бүгінде Қазақстанның экономикалық күретамырына айналды. Құрғақ айлаққа Қытай мемлекеті тарапынан тар танапты 3, Қазақстан тарапынан кеңжолақты осынша темір жол желісі тартылып, соңғы бірнеше жылдан бері көрші елмен жүк алмасып келеді. 2013 жылы салынған «Құрғақ порттағы» екі ел арасындағы жүк алмасудың негізгі басқарушы операторы – «RNZE-Ksrgos Gateway» ЖШС. Соңғы алты айда ғана бұл айлақта 4,2 млрд теңгенің қызметі көрсетілген.
Құрғақ айлақпен жапсарластыра 225 гектар аумаққа логистикалық орталық салынып, қоймаларда мыңдаған тонна жүк сақталып, сан тарапқа жөнелтіледі. Сонымен қатар 224 гектар жерге индустриялық аймақ орналасқан. Ондағы алғашқы өндіріс орындары іске кірісті. Яғни арнайы экономикалық аймақ қуатты өндіріс орындарының өркендеуіне де жол ашты. «Қорғас – шығыс қақпасы» арнайы экономикалық аймағының құрылысы жалпы бірнеше кезеңге бөлініп атқарылып, бірер жылға созылады. Анығын айтқанда, мұнда қазір де сан салалы құрылыс жүзеге асырылып жатыр.
Жақында «Құрғақ порттың» екінші жүк өңдеу кезеңі іске қосылды. Бұған дейін айлақтан күн сайын жүк тиелген 8-9 пойыз жіберілсе, енді бұл көрсеткіш екі есеге өсіп, күн сайын айлақтан жүк контейнерлері тиелген 18-19 пойыз сан тарапқа жол тартып жатыр. ҚХР тарапынан келетін контейнерлерге тиелген жүктің басым бөлігі Орталық Азия мен Парсы шығанағы арқылы Еуропаға, тағы да басқа шалғай шетелдерге қысқа мерзімде жеткізіледі. Солардың қатарында Hewiett Pacard, Toyota, DHL және тағы басқа да әлемге танымал көптеген компания өз тауарларын осы жерден Орталық Азия мен Батыс Еуропаға таратып жатыр. Бұл компаниялар негізінен шетелдерге озық үлгідегі жеңіл және ауыр автокөліктер, басқа да құрылғылар сатады.
Екінші кезеңнің іске қосылып, жүк тасымалын екі есе арттыруы «Құрғақ айлақ» қызметінің шегі емес. Болашақта бұл айлақта пойыздарға жүк тиеу жұмысы арта түспек. Яғни ел берекесіне еселеп табыс әкелетіні сөзсіз.
Жетісу облысы
