Өмірлік серігі Іңкәрмен бірге жеті бала тәрбиелеп, бәрін де адал еңбекке баулыды. Балаларына маңдай термен тапқан нанның тәтті боларын ұғындырды. Өйткені Аманғали Жаңабаев – ғұмырын мал шаруашылығына арнаған еңбек адамы. Қыр төсінде кіндік қаны тамып, әкесі Отарбайдың тәжірибесін жадына түйген ол еңбекке ерте араласты. Он сегіз жасында «Қызыл ту» кеңшарында шопанның көмекшісі болып бастаған кәсібін әскерден оралған соң қайта жалғастырды. Осы кеңшардың түйесін де, қойын да бақты. Түлік санын төлімен көбейтудегі адал еңбегі үшін «Қызылқоға ауданының чемпион түйешісі» атанды. Бұл оның жалғыз марапаты емес. Жыл сайын осындай марапатпен мерейі тасыды.
Оның балалары әр мамандықты игерген. Отбасында мұғалім мен дәрігер де, құқық қорғау саласының маманы да бар. Бұл әулет үшін мал шаруашылығы – атадан балаға мұра болып келе жатқан кәсіп.
Адал еңбекпен есейген әкенің абыройлы еңбек жолын жалғастырған ұлдары Думанбек, Құрманбек, Есен, Темір 2006 жылы мал шаруашылығын дамытуға бет бұрды. Сөйтіп, Құрманбек жетекшілік ететін «Құрман» шаруа қожалығын құрды. Қазір бұл қожалықта 230 жылқы, 140 түйе, 330 мүйізді ірі қара мен 1 500 қой бар. Адал еңбекпен есейген, жасы жетпістің желкенін керген қария әлі де үйде отыра алмайды. Балалары бағымын келістірсе де бір мезгіл төрт түліктің қоңына көз салып, ақыл-кеңесін беруді міндеті санайды. «Мырзабай» және «Наурызбай» атауын алған қыстақтың дайындығын тексереді. «Жамансай» аталатын жердегі жайылымның құнарына көз салады.
Қожалық жетекшісі Құрманбек мал тұқымын асылдандыру үшін селекциялық жұмысқа бет бұрды. Сөйтіп, абердин-ангус, қазақтың ақбас сиыры секілді тұқымдарынан тараған жаңа типті мүйізді ірі қараның төлі алынды. Мақсат – жазғы мезгілдегі аптап ыстығы, күзгі қара суығы мен қақаған аязы секілді табиғи құбылысқа төзімді сиыр өсіру. Жалынан ұстатпайтын асау жылқыны «Көшім» мен «Мұғалжар» тұқымымен асылдандырудың жемісі көріне бастады. Қазір асыл тұқымды әр жабағы 140-160 кило таза ет береді.
Он алты жыл бұрын құрылған шағын шаруашылықтан асыл тұқымды мал фермасына айналған «Құрман» шаруа қожалығы мемлекеттің қолдауын көріп отыр. Асыл тұқымды малға берілген субсидия қаржысымен ауыл шаруашылығы техникаларын жаңартып, Ойыл ауылдық округінің орталығы – Жасқайрат ауылында ет-сүт өнімдерін өңдейтін цехтың құрылысы басталды. Бұл цехта мал өнімдері озық технологиямен өңделеді. Цехты 2023 жылы толық іске қосу көзделген. Осылайша, ауыл тұрғындарына «Жасқайратта жасалған» таңбасымен шұжықтар мен сүзбе, қатық, қаймақ мен май секілді табиғи әрі сапалы өнімдер ұсынылмақ. Шаруа қожылығында жұмыс істеп жүрген 40-қа жуық ауыл тұрғынының қатары тағы 10-15 адамға көбейеді.
– Адал еңбек қана адамды абыройға бөлейді. Үнемі іздену, үйрену қажет. Әсіресе мал шаруашылығын дамыту үшін қырағылық қажет. Өзің өсіріп отырған малға жанашырлық танытпасаң, еңбегің еш болады. Төрт түліктен де табысы көл-көсір табыс табуға болады. Бірақ мал бағуды қиын көретіндер бар. Тегінде қиындықсыз жетістікке жететін жұмыс бар ма? Шаруа қожалығын құрып, мал шаруашылығын дамытуға бет бұрған ұлдарым қиындықты жеңіп келеді, – дейді Аманғали Жаңабаев.
Әке мен шешенің тәлімді тәрбиесін көрген балалары қайырымдылық істерден шет қалмайды. Жыл сайын Наурыз, Құрбан айт, Қарттар күні секілді мерекелерде әлеуметтік тұрмысы төмен және баласы көп отбасыларға, мүгедек жандарға демеушілік көрсетеді. Мүмкіндігі шектеулі 20 баланы қамқорлығына алған. Ауылдағы «Шалқыма» мәдениет үйінің бір бөлмесін балалар үшін күрес бөлмесі ретінде қайта жасақтауға қаржылай қолдау көрсетті. Он отбасының әрқайсысына қысқы мал азығы үшін 10 рулонды тегін береді.
Атырау облысы