Қоғамдық штабтың құрамына 474 адам енген. Олардың қатарында Халықтық коалицияға біріккен ұйымдардың белгілі азаматтары, ғылыми-сарапшылық қауымдастық өкілдері, Парламент депутаттары, жастар бар. Еліміздің әр өңірінде 226 штаб құрылып, 6 мыңнан астам адам қызмет
етеді.
Штаб мүшелері 200-ден астам елді мекенді аралап шығуды жоспарлап отыр. Осылайша, республикалық және өңірлік штабтар 52 мыңнан астам іс-шара өткізбек. Үгіт-насихат жұмыстарына Халықтық коалицияның 7,5 мың белсендісі тартылған. Сондай-ақ 30 мың сенімді өкіл тіркеліп, сайлау күні барлық учаскеде жұмыс істеу үшін 20 мыңға жуық бақылаушы дайындалды.
Республикалық және өңірлік қоғамдық штабтардың жұмысы туралы ақпаратты тыңдаған Қасым-Жомарт Тоқаев барлығына сенім артқаны үшін алғыс айтып, өзінің «Әділетті Қазақстан: бәріміз және әрқайсымыз үшін. Қазір және әрдайым» атты сайлауалды бағдарламасын таныстырды.