«Астана» ма, «Ақтөбе» ме?

Қазақстандық танымал фут­болшы және жаттықтырушы Александр Жуйковтың құрметіне өткізілген XXV турдағы бірқатар матчта тосын нәтиже тіркеліп, турнир кестесінің тек жоғары сатысында емес, төменгі жағында да айтарлықтай өзгерістер болды.

Мәселен, турдың орталық ойыны саналған «Ордабасы» – «Ақтөбе» арасындағы матчта қонақтар алаң иелерімен тең түсіп, чемпиондыққа сынық сүйем қалғанда сүрінді. Бірінші тайм­да 2:0 есебімен алда тұрған «Ақтөбе» футболшылары екінші таймда өз қақпасына екі гол өткізіп алды. Айналдырған 10 минуттың ішінде бас төреші Стас Покатилов қорғаған қақпаға екі пенальти белгіледі. Оларды алаң иелерінің 23 жастағы шабуылшысы Дми­трий Бородин сәтті орын­дап, командасын жеңілістен құт­қарып қалды. Сөйтіп 2:2 есе­бімен тең аяқталған кездесуде ақтө­беліктер тек екі ұпайынан ғана емес, өз тарихындағы алтыншы чемпиондығынан да айырыл­ды деуге болады. Себебі «Астана» соңғы турда ең кейінгі бес матчтың үшеуінде же­­ңіліп, екеуінде тең түскен Қа­ра­ғандының «Шахтерімен» кездеседі. Ал «Ақ­төбе» өз ала­ңында қола жүл­деге талас жүр­гізіп келе жатқан Алма­тының «Қайратын» қабыл­дайды.

«Ақтөбенің» ұпайдан шашау шығарғанын «Астана» клубы тиімді пайдаланып, сырт алаңда Петропавлдың «Қызылжарын» 2:0 есебімен тізе бүктірді. Ке­зекті жеңісіне қол жеткізген елор­далықтар, осылайша, өздерінің жетінші чемпиондығына қарай сенімді қадам жасады. Неге екені белгісіз, «Қызылжардың» бас жаттықтырушысы Әли Әлиев бұл ойынға негізгі құрамның бірнеше ойыншысын шығармай, қосалқы құрамда ұстап отырды. Атап ай­тар болсақ, чемпионат бойы «Қызылжардың» қақпасын қорғап келген Мирослав Лобанцев бұл жолы алаңға шыққан жоқ. Оның орнын Вадим Петров басты. Бұл матч 22 жастағы Петровтың ел чемпионатындағы дебюті болды. Сондай-ақ тәжірибелі қорғаушы Юрий Бушман да қосалқы құрамда қалса, шабуылшы Элгуджа Лоб­жанидзе тіпті матчтың хатта­масына да енген жоқ.

Ал «Тұран» мен «Мақтаарал» арасындағы оңтүстік дербиінде мақтааралдықтардың, яғни чем­пионат дебютантының мерейі үстем болды – 3:0. Қатарынан алтыншы матчта жеңіске жеткен «Мақтаарал» бұл жеңісінен кейін турнир кестесінің соңғы орындарынан тоғызыншы са­тыға дейін бір-ақ жоғарылады. Чем­пионат бойы клубтарға ұпай үлестіріп, көш соңында қалып қойған Түркістан облысының командасы соңғы турларда бар­лық ұпайын болмаса да, өзіне қажеттісін қайтарып алды. Сөйтіп ел біріншілігіне тұңғыш рет қа­тысып жатқанына қарамастан, турнир кестесіндегі тоғызыншы орнымен алдағы маусымда да Премьер-лигада ойнайтын болды.

Өткен турда-ақ «Мақта­аралдан» жеңіліп (1:0), бас жүл­деден де, күміс медальдан да күдерін үзген былтырғы ел чем­пионы – «Тобыл» сырт алаңда «Таразды» 2:0 есебімен жеңіп, үшінші орнын сақтап қалды. Ойындағы екі голды да команда капитаны Асхат Тағыберген соқты. Бір айта кетерлігі, ұлттық құраманың ойыншысы екі голын да айып соққысынан салды.

Сондай-ақ қола жүлдеге талас жүргізіп жатқан Алматының «Қайраты» Павлодардың «Ақ­суын» жеңді. «Орталық» стадион­да өткен матчта алаң иелері қо­нақтар қақпасына жауапсыз екі гол соқты. «Қайрат­тың» бра­зилиялық шабуылшысы Жоао Паулу 11 метрлік айып добын сәтті орындаса, матчтың аяқ­та­луына санаулы минуттар қал­ғанда Гүлжігіт Алықұлов мергендігімен көзге түсіп, есепті 2:0-ге жеткізді.

Ал көш соңында келе жатқан Оралдың «Ақжайығы» сырт алаңда «Каспиймен» тең ойнаса (0:0), Атырауда өткен «Атырау» – «Шахтер» матчында да жеңімпаз команда анықталмады – 2:2,

Чемпионаттың соңғы, шешу­ші туры 6 қарашада өтеді. Бұл турда «Қызылжар» – «Каспий», «Ақжайық» – «Тобыл», «Тараз» – «Тұран», «Мақтаарал» – «Орда­басы», «Ақтөбе» – «Қайрат», «Ақсу» – «Атырау» және «Шах­тер» – «Астана» клубтары кез­деседі.

Турнир кестесі