gov.kz
Төрағаның айтуынша, жыл басынан бері аумақтық департаменттермен мемлекеттік бақылауға алынған мыңнан астам тексеру іс-шаралары жүргізілген. Оның ішінде 865 жағдайында заң бұзушылықтар анықталған.
«122 ұйғарым берілді, әкімшілік құқық бұзушылық туралы іс бойынша 155 қаулы шығарылды. Әкімшілік айыппұл сомасы 140,6 млн теңгені құрады, бұл былтырғымен салыстырғанда 77%-ға жоғары», деді Қуаныш Елікбаев.
Сондай-ақ 70 аккредиттеу субъектісі тексеріліп, 39 субъектіде заң бұзушылықтар анықталған.
Нәтижесінде 6 айға бірнеше зертхана мен сертификаттау органдарында 4 аккредиттеу аттестатының қолданылуы тоқтатылып, 2,4 млн теңгеге айыппұл салынған.
Департамент 570 зергерлік бұйым сатушыға қатысты профилактикалық бақылау жүргізіп, 458 жағдайда құқық бұзушылықтар анықтаған.
«Бұл сатушылар сынақтан, талдаудан және таңбалаудан өтпеген тауарларды сатқан. Яғни Қазақстан таңбасы жоқ, Қазақстанда сынамасы расталмаған зергерлік бұйымдар», деп атап өтті төраға.
Брифинг барысында Қуаныш Елікбаев мемлекеттік бақылау - нарық айналымындағы өнімдердің қауіпсіздігін қамтамасыз етуге басымдық бере отырып, тұрақты негізде жүргізіліп жатқанын айтты. Оның ішінде сұр сертификаттармен күрес те күшейгенін мәлімдеді.
