Қылмыстық іс Астана қаласының Қылмыстық істер жөніндегі мамандандырылған ауданаралық сотына қарау үшін жолданған.
«Айыпталушылар ҰҚК-нің бұрынғы төрағасы К.Қ.Мәсімов және ҰҚК төрағасының бұрынғы орынбасары А.Т. Садықұлов мемлекетке опасыздық жасау (ҚК 175-бабының 1-бөлігі), билікті күшпен басып алу (ҚК 179-бабының 3-бөлігі), ауыр зардаптарға әкеп соққан билік пен лауазымдық өкілеттіктерді өзіне және басқаларға пайда мен артықшылықтар алу мақсатында асыра пайдалану (ҚК 362-бабы 4-бөлігінің 3-тармағы) туралы баптар бойынша сотқа берілді», делінген Бас прокруратура таратқан ақпаратта.
Сондай-ақ ҰҚК төрағасының бұрынғы орынбасары Д.Е. Ерғожин да билікті күшпен басып алғаны (ҚК 179-бабының 3-бөлігі), ауыр зардаптарға әкеп соқтырған билік пен лауазымдық өкілеттіктерді өзіне және басқаларға пайда мен артықшылықтар алу мақсатында асыра пайдаланғаны үшін ҚК 362-бабы 4-бөлігінің 3-тармағы бойынша айыпталып жатыр.
Айыпталушылар қатарында ҰҚК төрағасының бұрынғы орынбасары М.С. Осипов пен ҰҚК департамент бастығының бұрынғы орынбасары Д.М. Акипов, және ҰҚК-ның бұрынғы басқарма бастығы Н.К. Бекмурат та бар. Оларға қылмыстық кодекстің 362-бабының әртүрлі бөліктері бойынша айып тағылған.
Айта кетейік, қылмыстық іс «өте құпия» белгісімен тергелген және сотпен де осы тәртіпте қаралатын болады.
