Жүлде қоры 68 мың еуроға бағаланған Братиславадағы турнирде жерлесіміз украиналық Денис Молчановпен бірге жұп құрап өнер көрсетті. Осы доданың үшінші ракеткасы ретінде тіркелген қазақстандық-украиналық жұп бас жүлде үшін өткен финал бәсекесінде чехиялықтар – Петр Ноза мен Андрей Полсонды үш сетте – 4:6, 6:4, 10:6 есебімен тізе бүктіріп, турнирдің жеңімпаздары атанды.
Осылайша, Александр Недовесов өзінің спорт жолында челленджер турнирлерінде 25-титулына қол жеткізді. Бұл – қазақстандық теннисшінің жеке рекорды. Жерлесіміз 25 титулының үшеуін жекелей сында, 22-сін жұптық сайыста жеңіп алды. А.Недовесов үшін 2021 жыл аса табысты болып, жеті рет әртүрлі турнирлердің бас жүлдесін жеңіп алған еді.
