Еуразиялық экономикалық одаққа ірі экономикалық ойыншылар қызығушылық танытуда

АСТАНА. 29 мамыр. Бүгінде біз бірлесіп, экономикалық дамудың қуатты, тартымды орталығын, 170 миллионнан астам халықты біріктіретін ірі өңірлік нарықты құрудамыз. Ресей президенті Владимир Путин Еуразиялық экономикалық одақ құру туралы шартқа қол қою барысында осылай деді. Бұл туралы akorda.kz хабарлады. Владимир Путин: «Әлемдік аренада халықаралық құқық субъектісіне толық көлемде ие және Дүниежүзілік сауда ұйымы ұстанымдарына сай жаңа экономикалық ұйым пайда болады. Одақтың ұлтүстілік органдарына жекелеген өкілеттіліктерді беру біздің елдеріміздің егемендегіне түбегейлі зиян тигізбейтіндігі маңызды», – деді. Сондай-ақ, ол Еуразиялық экономикалық одаққа әлемдегі ірі ойыншылар қызығушылық танытып отырғанын да атап өтті. Бұдан бөлек, Ресей президенті: «Еуразиялық экономикалық одақ елдерінде дамыған өнеркәсіп, индустриялық база, қуатты кадрлық, интеллектуалдық, мәдени әлеует бар. Географиялық жағдайымыз бізге тек өңірлік қана емес, жаһандық та маңызы бар көлік-логистикалық бағдарлар қалыптастыруға, Еуропа мен Азияның ауқымды сауда жолдарын өзімізге «бағындыруға» мүмкіндік береді. Осының барлығы – біздің бірлестігіміздің бәсекеге қабілеттілігінің, оның жедел өзгеріп жатқан әрі күрделі әлемдегі қарқынды дамуының кепілі, – деді. Жолдыбай Базар. Дереккөз: akorda.kz. Фото: Орынбай Балмұрат.