«Егемен Қазақстан», «Казахстанская правда», «Қазақ әдебиеті», «Алматы ақшамы», «Вечерняя Алматы», «Заң газеті», «Юридическая газета», «Мөлдір бұлақ», «Балалар әлемі», тағы да басқа газет-журнал редакцияларының өкілдері оқырмандармен кездесіп, жазылым барысына қатысты сұрақтарға жауап берді.
«Алматы почтамты» Алматы филиалы директорының орынбасары Темірхан Мұсаев отандық пошта қызметінің барысына тоқталып, алдағы жоспар туралы ақпарат берді.
«Цифрлық технологиялар қарыштап дамыған кезеңде оқырманға газет-журналдарды дер кезінде жеткізіп отыру маңызды. Қала тұрғындары ақпаратты интернеттен жылдам алу мүмкіндігіне ие, ал шалғай ауылдарға басылымдарды уақтылы жеткізіп отыру үлкен жауапкершілік жүктейді. Өйткені оқырман өзі таңдап жазылған басылымнан қажетін іздейді, танымдық дүниелерді дер кезінде оқығысы келеді. Сондықтан оқырман қажетінен шығу үшін редакция мен «Қазпошта» филиалдары арасында мазмұнды, мақсатты жоспарларды жүзеге асыру қажет», деді Т.Мұсаев.
Пандемияға байланысты дәл бүгінгідей кездесу өткізудің мүмкіндігі болмады. Ендігі кезекте пошта басшылығы тарапынан жылына екі мәрте өтетін жазылу науқанына байланысты оқырмандармен кездесулерге қатысты шаралар форматын кеңейту жоспарланып отыр. Еліміздің барлық аумағына пошталық, логистикалық қызмет түрін ұсынып отырған ұлттық оператор ретінде «Қазпошта» өңірлер мәселесіне де көңіл бөліп, газет-журналдардың қолжетімділігін жеделдетуді, логистикалық саясатқа қатысты жұмыстарды жақсарта түспек.
Бүгінде дәстүрлі басылымдардың болашағына қатысты пікірлер екіге жарылады. Кәсіби мамандардың дерегінше, заманауи мерзімді басылымдар жаңғыру кезеңінде тұр. Ал цифрлық технологиялардың масс-медиа нарығына дендеп енуі дәстүрлі басылымдарға тың серпіліс береді.
Редакция өкілдері мен оқырман арасында осы мазмұнда өрбіген сұхбат алаңы әрі қарай концерттік бағдарламаға ұласты.
АЛМАТЫ
