Гвадалахарада Жансель Дениз (+73 кило), Смайыл Дүйсебай (87 кило) және Руслан Жапаров (+87 кило) сынды сақа спортшыларға үлкен үміт артқан едік. Олар осыған дейінгі бірқатар байрақты бәсекеде табысты өнер көрсетіп, жарқын жеңістерімен қазақ жанкүйерлерін қуантқан болатын. Бірақ жылдың басты жарысында жерлестеріміз білгендерінен жаңылып, сенім үдесінен шыға алмады. Сондай-ақ Темірлан Тілеулес (54 кило), Самирхон Абабәкіров (58 кило), Камран Нұрадинов (63 кило), Алмат Қожахмет (68 кило), Нұрқанат Қожахмет (74 кило), Рақым Әділханов (80 кило), Рита Бәкішева (46 кило), Ботагөз Қапанова (49 кило), Әзиза Қараджанова (53 кило), Кәмила Аймұқашева (57 кило), Жадыра Хайруллина (62 кило) және Нұрай Құсайынова (67 кило) да жарты жолға жетпей сүрінді.
Аталған жарыста Мексика спортшыларының мерейі үстем болды. 3 алтын, 1 күміс және 2 қола медаль олжалаған олар жалпыкомандалық есепте көш бастады. Мексикалықтар арасынан Даниэла Соуза (48 кило), Лесли Солтера (67 кило) және Карлос Сансорес (+87 кило) қарсылас шақ келтірмей, жеңіс тұғырының ең биік сатысына көтерілді. «Батыстың інжу-маржаны» аталған шаһарда Қытай (2 алтын+3 күміс+1 қола), Оңтүстік Корея (2+2+1) және Сербияның (2+1+2) әнұраны екі реттен шырқалды. Аспанасты елі өкілдері арасынан Лу Зонши (57 кило) мен Лиан Юшайдың (63 кило) асығы алшысынан түсті. Корейлердің қатарындағы Квон-До Юн (68 кило) мен Парк Ву Хектің (80 кило) қарқынына ешкім шыдай алмады. Қарт құрлықтың өрендері арасында Надика Бозанич (73 кило) пен Мехди Ходабакшидің (87 кило) мерейі үстем болды. Сондай-ақ бас жүлде алғандардың қатарында испаниялық Даниэл Куасада ( 74 кило), өзбекстандық Светлана Осипова (+73 кило), хорватиялық Лена Стойкович (46 кило), бельгиялық Сара Шаари (62 кило), мажарстандық Омар Салим (58 кило), италиялық Вито Делл’Акуила (54 кило) және америкалық Макайла Гринфууд (53 кило) бар.
Бір айта кетерлігі, осы жарыста Өзбекстан құрамасы қазақстандықтарға қарағанда әлдеқайда жақсы өнер көрсетті. Алтыннан алқа таққан Светлана Осиповадан бөлек, Нияз Пулатов (63 кило) күміс медальды еншіледі. Ал Феруза Садықова (62 кило) мен Никита Рафалович (87 кило) қолаға қол созды. Осы нәтиженің арқасында өзбектер жалпы есепте алтыншы орынға тұрақтады.
1993-2019 жылдар аралығында Қазақстанның таэквондошылары әлем чемпионатына 14 рет қатысты. Соның алтауында ғана жеңіс тұғырына көтерілу бақыты бұйырды. Тарқатып айтсақ, 1999 жылы (1 қола), 2003 жылы (1 қола), 2007 жылы (3 қола), 2009 жылы (1 қола), 2017 жылы (1 қола) және 2019 жылы (1 қола). Барлығы – 8 жүлде. Ал сегіз жарыстан қоржынымыз бос қайтты. Міне, солардың қатарына күні кеше ғана Мексикада аяқталған дүбірлі дода еніп отыр. Бұл – отандық даян шеберлерінің тоғызыншы сәтсіздігі.
