![Форум мақсаты – жас авторларды қолдау](/media/2022/11/25/ks5viladsd8.jpg)
Қазақ әдебиетін шетелге насихаттау, әлем әдебиетінің күрделі проблемалары бойынша пікір алмасу және қазақ жазушылары мен публицистерінің шетел әріптестерімен шығармашылық байланысын нығайту, жас жазушылар мен публицистердің шығармашылық проблемаларын талқылау, шетел жазушыларының қазақ әдебиетіне деген ықыласын арттыру – форум көтерер басты тақырыпқа айналмақ.
Алғашқы кітабын шығару оңай болмаған өткен кезеңмен салыстырғанда, шығармашылық еркіндікке қол жеткізген бүгінгі әдебиетте сырт қарағанда көп қиындық жоқ секілді қабылданады. Бірақ әр кезең жас қаламгерге өз қиындығын таңады. Сондықтан ұйымдастырушылар халықаралық ауқымды форумның алаңы әдебиеттегі бүгінгі жас қаламгерлердің тұтас шынайы бейнесін олардың шығармалары арқылы танудың таптырмас мүмкіндігі деп отыр. Қазақ ПЕН-клубы форум жұмысына қатысуға талантты жастар санатынан (жасы 40-тан аспаған) 40-43 қазақ жазушысын іріктеп алды, олар өз жұмыстарын ұйымдастыру комитетіне алдын ала тапсырған. Тапсырылған жұмыстардың біразы аударылып, семинар жетекшілеріне жіберілді. Семинар жетекшілерінің санатында Қазақстанның алты белгілі жазушысы бар.
Үшінші Халықаралық форумның жұмысы «Жас авторларға қолдау көрсету: іздеу, кәсіби дамыту. Ілгері дамыту» атты мәселені қаузайтын пленарлық отырыспен басталып, мұнда жас жазушылардың баяндамасы тыңдалады. Ал «Әдеби білім: проблемалар, шешім, ұсыныстар» атты дөңгелек үстелде бүгінгі поэзия, проза, публицистикадағы ортақ мәселелер безбенделеді. Сондай-ақ семинар жетекшілері мен меймандар диспут жүргізушілері ретінде шағын шоғырға бөлініп, жастар шығармашылығын бірлесе талқылайды. Бұл күні Б.Кенжеев, В.Карцев, Е.Абдуллаев, Э.Гер, М.Шевченко және басқалар шеберлік сабақтарын өткізеді.
Жазушылар мен публицистердің үшінші Халықаралық форумын ұйымдастыру комитетінің жетекшісі, Қазақ ПЕН-клубы президенті Бигелді Ғабдуллин: «Осымен үшінші рет Қазақ ПЕН-клубы осындай ауқымды форум өткізгелі отыр. Бұған дейінгі форумдарда қазіргі әдебиеттің ең күрделі мәселелері жөнінде әңгіме қозғалды.
«Жастар туралы сөз. Жастарға – сөз» басқосуының модераторлары болып Бигелді Ғабдуллин, Бақыт Кенжеев және Жүсіпбек Қорғасбек бекітіліп отыр. Форумның соңғы отырысынан кейін әртүрлі аталымдар бойынша үздік жұмыстардың қорытындысы хабарланады. Жас жазушылар мен публицистердің шығармашылығына арналған келелі кеңестің мазмұнды әрі пайдалы болатынына қазірден сенім мол. Аса маңызды әдеби жиынның басты назарын жастар шығармашылығына аударып отырудағы мақсат та сол – өз елінің насихатшысы болып отырған қаламгерді уақытқа лайық даярлау.
АЛМАТЫ