Пікір • 01 Желтоқсан, 2022

Әлеумет зәрулігіне мән берген жөн

59 рет көрсетілді

Мемлекет басшысы Қасым-Жомарт Тоқаевтың 26 қарашада өткен ұлықтау рәсімінде айтқан сөздері, көтерген мәселелері – жұртшылықтың жіті назарында жүрген маңызды сұрақтар екені даусыз. Салтанатты рәсімде әуелі өзін қолдаған барша қазақстандықтарға ризашылығын білдірген Президент алдағы уақытта іске асырылатын басым бағыттарды жіктеп көрсетті. Әсіресе Қасым-Жомарт Кемелұлының ауылды өркендетуге қатысты пікірлері аса маңызды деп білемін.

Қазақ халқында «Ауылым – алтын бесігім» дейді, бүгінде ел тұрғын­дарының жартысына жуығы ауыл халқы. Қалада тұратындардың да басым үлесі жаңадан қоныс аударушылар, яғни ауылдан келген тұрғындарға тиесілі. Қаншалықты урбанизация үдерісі жүрсе де, қазақ халқы өзінің түп қазығы болған ауылдан қол үзген емес.

Дегенмен де қала тұрғындары санының күн санап өсуі әлеуметтік мәселелерді алға шығарды. Мәселен, қала халқының саны артқан сайын жаңа балабақша, мектеп, емхана және басқа да әлеуметтік нысандарды салу қажеттігі туындап отыр. Қазірдің өзінде мұндай өзекті мәселелер еліміздегі ірі мега­полистерде ғана емес, шағын қала­ларда да күн тәртібінен түспей келеді.

Сондықтан да ауылдың жағдайын жақсарту мемлекеттік мәселе болып табылады. Ауылдың инфрақұрылымын дамыту, балабақшалар, мектептер, спорт нысандарын тұрғызу, халықты таза ауыз сумен қамтамасыз ету, елді мекендердің электрмен қамтылуы, жолдар­дың сапасы қала мен ауыл арасын­дағы алшақтықты жойып, ауыл тұрғын­дарының қалаға көшу үдерісін тоқта­та алады. Сонымен қатар ауылды көр­кейту ауыл шаруашылығын дамыту­ға, елді мекендердегі ауыл шаруа­шы­лығымен байланысты шағын бизнес­ті дамытуға, ауылда жастардың тұрақ­тауына жол ашады деген сенім мол.

Жаңа мамандықтар қажеттілігіне жасалған талдаулар, алдағы уақытта ауылша­руа­шылық мамандарына сұраныс­тың артатынын көрсеткен. Қазақ­стан – жоғары сапалы азық-түлікті, оның ішінде ет пен астық өнімд­ерін өндіретін ел. Халықаралық деңгейде азық-түлікке сұраныс артса, бұл – отан­дық фермерлерге, ауыл шаруа­шы­лы­ғын дамытуға серпін беретін жаңа бағыт. Біз табиғи кен байлық­тар­ды, шикізатты өндіруден басқа осы аграрлық сектордың дамуына баса көңіл бөлуге тиіспіз.

Бұл үшін кәсіби мамандарды тартып, алдағы кезеңде ауыл үшін қажет деген мамандық иелерін даярлаумен қатар, жастардың ауылға баруға деген құлшыныстарын арттыру керек. Университеттер де өз кезегінде ауылдық жерлердегі мектептер, балабақшалар, басқа да кәсіпорындарда болашақ мамандар үшін тәжірибе алаңдарын жасау, өзара әріптестік байланыстар жүргізуді қолға алады. Бұл оқу орындарының алдыңғы қатарында Х.Досмұхамедов атындағы Атырау университеті де бар.

 

Саламат ЫДЫРЫСОВ,

Х.Досмұхамедов атындағы Атырау университеті басқарма төрағасы-ректор

Соңғы жаңалықтар

Ұқсас жаңалықтар