Қатардағы әлем чемпионатының топтық кезеңдегі соңғы тур ойындарын плей-оффқа дейінгі плей-офф матчтары десе де болатындай. Өйткені кейбір матчтарда жеңіске жеткен құрама келесі кезеңге шықса, жеңілгені өз еліне қайтады. Кей кездесулердің жөні тіпті бөлек. Қарсыласын қанша жерден ірі есеппен тізе бүктірсе де, атағы дардай құрама болса да, топтық кезеңнен шыға алмай, жанкүйерлері алдында масқара болды. Сондай құраманың бірі – Германия.
2014 жылғы Бразилиядағы доп додасының финалында жарыс қожайындарын 7:1 есебімен жеңіп, әлем чемпионы атанғаннан кейін «неміс мәшинесін» қырсық шалды. Олар 2018 жылғы Ресейдегі футбол тойында Кореядан жеңіліп, плей-оффтан құр қалып қойған болса, араға төрт жыл салып Қатарда да сол сценарий қайталанды. Бұл жолы соңғы турда жеңгенімен, бәрібір топтан шыға алмады. Сол аралықта Германия екі Еуропа біріншілігіне қатысып, екеуінде де финалға жете алмады.
Иә, Германияның соңғы турда плей-оффқа шығу-шықпауы қатар өткен Испания – Жапония матчына тікелей байланысты еді. Испаниялықтар соңғы турда Жапонияны жеңгенде Германияны өздерімен бірге келесі кезеңге алып шығар еді. Бірақ күтпеген жерде Күншығыс елінің өкілдері айды аспанға бір-ақ шығарып, Испанияны да тізе бүктірді. Осылайша, жапониялықтар бір әлем чемпионатында екі бірдей мундиалдың жеңімпазын жеңіп, 1/8 финалға шықты. Сөйтіп, Е тобынан Жапония бірінші орынмен, Испания екінші орынмен келесі кезеңге өтті.
F тобындағы төрттікте 2018 жылғы әлем біріншілігінің қола жүлдегері Бельгия соңғы турда Хорватияны жеңе алмай (0:0), биылғы доданы ерте аяқтауға мәжбүр болды. Қатардағы доп додасы басталмай тұрып футбол мамандарынан «қай топ құрамалар топтан шыға алмай қалуы мүмкін», деп сұрау салғанда, көпшілік Португалия мен Францияны атаған болатын. Себебі Португалия Роналдудың төңірегіндегі дау-дамайға байланысты ішкі тәртіпсіздікке тап келсе, Франция бұл әлем біріншілігіне негізгі құрамның бірнеше футболшысын әкеле алмаған еді. Ал Бельгиядан ешкім мұндай сүреңсіз ойынды күткен жоқ еді. Сөйтіп, Бельгияның 2010 жылы басталған «алтын дәуірі» осымен аяқталған сияқты.
Бельгияның сәтсіздігін тиімді пайдаланған Марокко соңғы турда Канаданы бір доп айырмасымен жеңіп (2:1), 1986 жылдан кейін бірінші рет әлем чемпионатының плей-офф кезеңіне жолдама алды. Тіпті Африка құрлығының өкілі топтық кезеңде бірде-бір ойында жеңілмей, жеті ұпаймен өз тобында көш бастады. Хорватия бес ұпаймен екінші орынға жайғасты.
G тобындағы екінші жолдамаға (біріншісін Бразилия екінші турда-ақ иеленіп қойған) Камерун, Швейцария және Сербия құрамалары таласып, Швейцария футболшыларының асығы алшысынан түсті. Олар өте тартысты өткен соңғы турда Сербияны 3:2 есебімен жеңді. Ал Камерун құрамасы 3-турда Бразилиядан басым түскенімен (1:0), бәрібір топтық кезеңде қалып қойды.
H квартетінің соңғы турында Португалия Корея құрамасынан жеңілсе де, екеуі бір-бірін 1/8 финалға алып шықты. Бір қызығы, Португалия – Корея матчының 90-минутына дейін таблода 1:1 есебі тіркеліп, қатар өтіп жатқан ойында Гананы 2:0 есебімен жеңіп жатқан Уругвай бір аяғымен плей-оффта тұрған еді. Алайда кореялықтар төреші қосқан қосымша минутта Португалия қақпасына екінші голын соғып, екінші жолдаманы Уругвайдан тартып алды. Бар мәселені ойынның соңында соғылған бір ғана гол шешіп кетті. Өйткені Корея мен Уругвай құрамасы соңғы турдағы жеңістерінен кейін 4 ұпаймен екінші орынды өзара бөліскенімен, кореялықтар доп айырмасының арқасында келесі айналымға жолдама алды. Азиялықтар үш турда төрт гол соғып, өз қақпасына төрт гол өткізіп алған болса, оңтүстікамерикалықтар екі гол соғып, екі гол өткізіп алған еді. Сөйтіп, Уругвай үшінші орынға түсіп қалды.
Сенбі күні өткен плей-офф матчтарының алғашқы екі ойынында Нидерланд пен Аргентина құрамалары жеңіске жетіп, ширек финалда сынға түсетін бірінші жұпты анықтап берді. «Қызғалдақтар» елінің құрамасы 1/8 финалда АҚШ-ты 3:1 есебімен тізе бүктірсе, Месси бастаған Аргентина құрамасы әрең дегенде Аустралия футболшыларынан басым түсті – 2:1. Бұл ойында мергендігімен көзге түскен Месси өзінің ұлттық құрамадағы 1000-ойынын өткізді. Нидерланд пен Аргентина арасындағы ширек финал матчы 9 желтоқсанға жоспарланған.
