Бәсі жоғары бәсекеде Астана қаласы әкімдігінің №2 Балалар мен жасөспірімдер спорт мектебінің спортшыларымен қатар Қостанай, Петропавл, Хромтау және Алматы қаласының үздік конькишілері жарыстың көрігін қыздырды. Ашық біріншілікке қатысуға 130 спортшы ниет білдірген соң, қала әкімдігі балалар мен жасөспірімдер қатысатын доданы дәстүрге айналдыруды көздеп отыр. Жарыстың шарты бойынша балалар 5 жас санаты бойынша сынға түсті. Айтулы турнирдің бірінші күнінен-ақ жасөспірімдер командалық сында бағын сынап, бабын байқатты. Төрт айналымдық аралас командалық спринтте әр командадан 2 қыз және 2 ұл өнер көрсетті. Нәтижесінде, Петропавл қаласының өрендері – Алина Шүмекова, Кристина Шүмекова, Артем Савельев, Владимир Довженко бастаған төрттік қарсыластарын шаң қаптырды. Ал екінші орынды Астана-2 командасы еншілесе, үшінші орын елорданың үшінші (Астана-3) командасына бұйырды.
Сәті түскенде Петропавл қаласындағы Балалар мен жасөспірімдер спорт мектбінің жаттықтырушысы Ольга Ихтендрестен конькимен жүгіру спорты туралы және жарысқа келген балалардың аяқалысы жайында сұраған едік.
– Біз «Алау» мұз айдынына жиі келуге тырысамыз. Петропавлда мұндай сапалы мұз айдыны жоқ. Осы кешенде жас конькишілердің белгілі бір жылдамдыққа жүгіруге, арнайы жаттығуын жасап, жарысқа дайындалуына толық мүмкіндігі бар. Сол үшін де ел біріншілігінен бөлек байрақты бәсекелер де осы елордада ұйымдастырылады. Балалар мен жасөспірімдер арасында осындай турнирлер жиі ұйымдастырылса, біз де қуанамыз. Кезекті аламанға Петропавл қаласынан 40 ұл-қыз алып келдік. Балалар жас ерекшеліктеріне қарай бес топта сынға түседі. Біз жарысқа өзге қалалардан бұрын келіп, бірер күнді жаттығуға, балалардың дайындығына арнадық. Петропавлда Астана қаласындағыдай жабық мұз айдыны жоқ. Әрі біздегі жарыс жолағы шағын, яғни стандартқа сай емес. Амал жоқ, ауа райының қолайсыздығына қарамай дайындаламыз. Өйткені дарынды балалар тасада қалмауы керек, – дейді ол.
Тәжірибелі жаттықтырушы О.Ихтендрес Петропавл қаласындағы жас коньки шеберлерінің қатарындағы Алина және Кристина Шүмековалар сынды егіз қыздардың өз жасына әбден лайық өнер көрсетіп жүргенін айтады. Жаттықтырушылар бұған дейін де талай жарыста топ жарып жүрген үздіктерге осы турнирде де зор сенім артып отыр. Мысалы, жарыстың алғашқы күніндегі командалық сында Алина мен Кристина командаластарын алға сүйреді. Петропавлдың үздіктері ауылдан шыққан. Қазір Петропавлдағы спорт интернатында жаттығады. Жаттықтырушылар 14 жастағы Варвара Глухова есімді спортшының да үздіктер қатарынан көрінетініне іштей сенім артып отыр. Әзірге Петропавл қаласының атынан мұз айдынына шығатын кіші топтағы ұлдардың жүлдеге ілігуі екіталай екен. Өйткені жасы кіші ұлдар мұз айдынына жиі шықпайды. Десек те спорт мектебінің жаттықтырушылары 2024 жылы өтетін жасөспөрімдер Олимпиадасына жоғарыда есімдері аталған үздіктерді қосуға ниетті. Ол үшін, әрине, жасөспірімдер ел чемпионатында қатарластарынан тәуір нәтиже көрсетуге тиіс.
– Жақсы нәтижеге қол жеткізу үшін балалардың дайындығына жоғары мән беру керек. Сондықтан олардың дұрыс тамақтануына, салмағын қалыпты деңгейде ұстап, физикалық әлеуетін нығайтуға ерекше мән береміз. Коньки тебу үшін де күш керек. Конькишілердің жауырыны, аяқ-қолының күші мығым болуы да маңызды. Өйткені конькимен жүгіруде адамның бұлшық еті көмектеседі. Әйткенмен балалардың дене бітімі қалыптасқанша жеңіл жаттығулар жасатамыз. Конькимен сырғанауды айтпағанда, мұзда тік тұрудың өзіне жылға жуық уақыт кетеді. Әрине, балалар арасындағы бәсекелерде астаналықтардың алдына түсетін команда жоқ деп айтуға болады. Бірақ біз де қаражаяу емеспіз. Кемінде әр жарыстан бірлі-екілі спортшымыз жүлделі оралады. Мұны тәуір нәтиже деп білеміз. Балалардың барлық шығынын спорт мектебі өтейді. Жас конькишілерге жағдай жасап отырған өңірдегі спорт басқармасына алғысымыз зор. Неге десеңіздер, біздегі балалардың барлығы қарапайым отбасыдан шыққан. Тіпті балалардың арасында әлеуметтік жағдайы төмен отбасында тәрбиеленетін балғындар бар. Бірақ спорт тарихында бабы келісіп, бағы жанған спортшылардың дені осындай қарапайым отбасында тәрбиеленгенін қаперден шығармауымыз керек, – дейді О.Ихтендрес.
Демек, елордадағы турнирде жасындай жарқыраған жасөспірімдердің келешекте конькимен жүгіруден ұлттық құраманың сапында әлемдік додаларда өнер көрсетуге мүмкіндігі мол. Ендеше, турнирде топ жарған дарынды балалардың спорттық мансабы табысты болғай демекпіз.
