Аймақтар • 06 Желтоқсан, 2022

Әбсаттар Дербісәлі атындағы дәрісхана

108 рет көрсетілді

Әл-Фараби атындағы Қазақ ұлттық университетінде академик, филология ғылымдарының докторы, профессор, шығыстанушы ғалым, дипломат Әбсаттар қажы Дербісәлінің туғанына 75 жыл толуына орай «Шығыстану және руханият мәселелері» тақырыбында халықаралық ғылыми-теориялық конференция өтті.

«Әл-Фараби» атындағы кітап­ханада «Академик Әбсаттар Дербісәлі атындағы сирек кітап­тар мен қолжазбалар қорының» ашылуымен басталған алқалы жиын барысында Шығыстану факультетінде академик Әбсат­тар Дербісәлі атындағы дәрісхана ашыл­ды. Конференцияны әл-Фара­би атындағы ҚазҰУ ректоры Жан­сейіт Түймебаев ашып, академик Әбсаттар Дер­бісәлінің өмір жолына, ел ғылы­мының дамуы­на қосқан сүбелі еңбегі, оқу-ағар­­ту­шылық қызметіне тоқталды. 

Алқалы жиын барысында Парла­мент Сенатының Төр­ағасы Мәулен Әшімбаевтың, Премьер-Министрдің орынбасары – Сыртқы істер министрі Мұхтар Тілеубердінің, Президент Әкімшілігі Басшысының орынбасары Аида Балаеваның,  Ақпарат және қоғамдық даму министрі Дархан Қыдырәлінің, Ғылым және жоғары білім министрі Саясат Нұрбектің құттықтау хаттары оқылды.

Парламент Сенатының Төр­аға­сы Мәулен Әшімбаев­тың құт­­тық­тау хатында: «Әбсат­тар Дер­бісәлі Қазақ­стан мұсылман­дары діни басқарма­сының төр­ағасы, Бас мүфти ретінде еліміз­дегі бейбітшілік пен келісімнің нығаюына зор еңбек сіңірді. Ғалымның еңбектері ислам әлемі үшін құны жоғары. Ел үшін аянбай еңбек еткен тұлғаның  парасат пен тағылымды өмірін кеңі­нен дәріптеу баршамыздың аза­маттық парызымыз. Осы тұрғыда бүгінгі шараның маңызы зор» делінген.

Саналы ғұмырын ғылым мен білімге арнаған ғалымның діни ағарту саласындағы еңбегі, Қазақ­стан мұсылмандары діни бас­қармасын басқарған жылдар­дағы оқу-ағарту саласын­дағы ғылы­ми еңбектері, ғибратты шығар­малары қоғамды ізгілікке үндеді. Қазақстан мұсылмандары діни басқармасының төраға­сы, Бас мүфти Наурызбай қажы Тағанұлы осы жиында баяндама жасап, академик Әбсаттар қажы Дербісәлі басшылық еткен жылдарда ҚМДБ жаңа кезеңге аяқ басқанын атап өтті.

«Әбсаттар қажы Дербісәлі сана­лы ғұмырын ғылым мен білім­ге арнаған ғалым. Өзіне жүк­телген дінбасы қызметін абы­­роймен атқарды. Дін сала­сын­да құжаттандыру, іс қағаз­дарын жүргізу мәселесін ретке келтірді. Діни мамандарын даярлау ісіне көңіл бөліп, 2001 жылы «Нұр-Мүбәрак» Мысыр-Ислам мәдениеті университетін ашты. Қазіргі таңда аталған білім ордасы діни жоғары білімді, білікті мамандар даярлайтын оқу орнына айналды. Сондай-ақ еліміздің тоғыз аймағынан тоғыз медресе, бір қарилар дайындайтын орталық ашылды. Академик «Мешіт пен медреселер» кітабында еліміздегі тарихи, заманауи мешіттер, көне және кейіннен ашылған медреселер жөнінде кеңінен ақпарат берді. Алдағы уақытта ҚМДБ төралқа мәжілісінде хазіретіміздің атын еліміздегі бір мешітке беру жос­парлануда», деді Бас мүфти.

Мемлекет және қоғам қайрат­керлері, Түркия, Ресей, Мысыр, Иордания, Өзбекстан, Тәжікстан, Иран мемлекеттерінің елшілері мен консулдары, дін саласының қызмет­керлері, ҚазҰУ-дің оқыту­шы-профессорлар құрамы және білім алушы жастар қатысқан жиын барысында «Әбу Насыр әл-Фараби шетел және Қазақстан ғалымдарының зерттеулерінде» кітабы мен «Академик Әбсаттар Дербісәлі ғалымның ғибратты өмір жолы» атты естелік  кітаптарының  таныстырылымы өтіп, секциялық жұмыстармен жалғасты.

 

АЛМАТЫ

Соңғы жаңалықтар

Ұқсас жаңалықтар