Чемпионаттың ресми ашылу салтанатына Мәдениет және спорт министрі Дәурен Абаев, Халықаралық шахмат федерациясының президенті Аркадий Дворкович, Алматы қаласының әкімі Ерболат Досаев және тағы басқа жарыстың ресми тұлғалары қатысты. Дәурен Абаев Мемлекет басшысы Қасым-Жомарт Тоқаевтың атынан құттықтау сөзін оқып берді.
Жалпы, 1998 жылдан бері тұрақты түрде ұйымдастырылып келе жатқан шахматшылардың әлем чемпионатына қатысу бақыты кез келген спортшыға бұйыра бермейді. Сондықтан ұйымдастырушылар жылдың ең маңызды турниріне тек жыл бойы жоғары нәтиже көрсетіп, өз мықтылығын дәлелдеген шахматшыларды ғана шақырады. Яғни ерлер арасындағы әлем біріншілігіне қатысу үшін олардың әлемдік рейтингтегі ұпайы 2550-ден аз болмауы керек. Ал әйелдер арасындағы додаға қатысу үшін шахматшы қыздарға жыл бойы 2250 ұпай жинау қажет болады.
Алатау баурайында алғаш рет өтіп жатқан дүбірлі доданың ерлер арасындағы бәсекесінде Магнус Карлсен (Норвегия, желтоқсан айындағы әлем рейтингіндегі ұпайы 2859), Хикара Накамура (АҚШ, 2768), Фабиана Каруана (АҚШ, 2766), Ян Непомнящий (FIDE, 2793), Аниш Гири (Нидерланд, 2764), Александр Грищук (ФИДЕ, 2745), Шахрияр Мамедяров (Әзербайжан, 2740), Ян-Кшиштоф Дуда (Польша, 2729), Юй Янъий (Қытай, 2728) және былтыр Польшада өткен әлем чемпионатының қазіргі чемпионы – Максим Вашье-Лаграв (Франция, 2737, Блиц), сонымен қатар басқа да атақты шахматшылар сынға түсіп жатыр.
Ал әйелдер арасында Александра Горячкина (ФИДЕ, 2584), Катерина Лагно (ФИДЕ, 2563), Хампи Конеру (Үндістан, 2572), Тан Жонгуй (Қытай, 2518), Нана Дзагнидзе (Грузия, 2517), Харика Дронавали (Үндістан, 2507), Жансая Әбдімәлік (Қазақстан, 2496), Сарасадат Хамедальшарьех (Иран, 2490), Антоанета Стефанова (Болгария, 2442), қазіргі чемпиондар Александра Костейнюк (ФИДЕ, 2520 – рапид) және Бибісара Асаубаева (Қазақстан, 2440) сияқты даңқты спортшылар және де басқа да мықты шахматшылар ойнайды.
Бибісара Асаубаевадан бөлек, биылғы әлем чемпионатына Қазақстан құрамасынан Ринат Жұмабаев, Жансая Әбдімәлік (рейтингте 2496 ұпайы бар), Динара Сәдуақасова, Бибісара Асаубаева (2440 ұпай), сонымен қатар Гүлісхан Нақбаева, Қазыбек Нөгербек, Әсел Серікбай сынды 40-тан аса отандасымыз қатысып жатыр.
Турнирді ұйымдастырушылар – Халықаралық шахмат федерациясы (FIDE) мен Қазақстан шахмат федерациясы. Әлем біріншілігі Алматы қаласы әкімдігінің және Мәдениет және спорт министрлігінің қолдауымен өткізіліп жатыр. Жарыстың жалпы жүлде қоры – 1 млн АҚШ долларын құрап отыр.
