Хопман кубогі және ATP Cup жарысының орнын басатын аталған додаға қатысушылар ATP және WTA рейтингінде 500 ұпайға дейін иеленіп, табысын молайта алады. Бұл сында Қазақстан намысын Юлия Путинцева (№51), Жібек Құламбаева (жұптық сында №202), Гөзал Айнитдинова (жұптық сында №392), Александр Бублик (№37), Тимофей Скатов (№142), Денис Евсеев (№292) және Григорий Ломакин (жұптық сында №205) қорғайды.
Қазақстандық теннисшілер В тобында Польша және Швейцария құрамаларымен сынға түседі. Бұл топтағы бәсекелердің бәрі Брисбен қаласында өтеді. Бүгін алғашқы болып Юлия Путинцева, іле-шала Тимофей Скатов кортқа шығады. Путинцева швейцариялық Белинда Бенчичпен шеберлік байқасады. Жерлесіміз Б.Бенчичпен бүгінге дейін бес мәрте кездесіп, үш матчта қарсыласынан басым түскен. Скатовтың қарсыласы – Марк-Андреа Хюслер.
