Шахмат жанкүйерлерінің есінде болса, былтыр да жыл басын сүйінші хабармен бастап, оқырмандарымызды қуантқан едік. Польшаның бас шаһары – Варшавада өткен шахматтың блиц түрінен Бибісара Асаубаева тұңғыш рет әйелдер арасындағы әлем чемпионатында топ жарған-ды. Міне, Бибісара биыл да сол биігінен көрініп, қатарынан екінші жыл шахмат әлеміндегі теңдессіз спортшы атанды. Сондай-ақ ол былтыр қазақстандық шахматшылар арасынан ересектер арасындағы дүниежүзілік додада дараланған тұңғыш спортшы атанып, əлем чемпионаттарында ең жас чемпион атанған алғашқы шахматшы ретінде тарихқа өз атын алтын әріптермен жаздырды.
Халықаралық шахмат федерациясы (FIDE) мен Қазақстан шахмат федерациясы ұйымдастырған Алматыдағы әлем біріншілігіне дүниежүзінің 46 мемлекетінен 178 ер мен 98 әйел шахматшы бақ сынады. Жер-жаһанның ең таңдаулы гроссмейстерлері жиналған әлемдік доданың соңғы турына дейін Б.Асаубаева рапидтен әлем чемпионы қытайлық Тань Чжунъимен иық тірестіріп, турнир кестесінің бірінші орнын өзара бөлісіп тұрған еді. Шешуші, соңғы турда отандасымыз жеңіске жетіп, қытайлық шахматшы қарсыласына жол бергеннен кейін, әлем біріншілігінің жеңімпазы мен күміс жүлдегерінің есімі белгілі болды. Ал қола жүлде ресейлік Полина Шуваловаға бұйырды.
Ерлер арасындағы бәсекеде норвегиялық Магнус Карлсен рапид және блицтен әлем чемпионы атанып, былтырғы атағын қорғай білді. Ал рапидтен қыздар арасындағы алтынды қытайлық Тань Чжунъи иеленсе, күміс жүлде отандасымыз Динара Сәдуақасоваға бұйырған еді.
