Әуелде чемпиондық тәж үшін 2022 жылғы жеңімпаз норвегиялық даңқты гроссмейстер Магнус Карлсен мен былтырғы үміткерлер турнирінің үздігі ресейлік Ян Непомнящий сынға түсуге тиіс еді. Алайда норвегиялық шахматшы биыл чемпиондық атағын қорғаудан бас тартты. Сөйтіп Халықаралық шахмат федерациясының ережесіне сәйкес, спортшы әлем чемпионы атағын қорғаудан бас тартқан жағдайда, оның орнына үміткерлер бәсекесінде екінші орынға ие болған шахматшы шығады. Ал былтырғы бәсекеде қытайлық гроссмейстер Дин Лижэнь Непомнящийден кейінгі орынға жайғасқан болатын.
Магнус Карлсен 2021 жылдың желтоқсанында чемпиондық тәжді өзінде сақтап қалуға мотивациясы болмағандықтан, 2023 жылы чемпиондық атағынан бас тартуы мүмкін екенін айтқан еді. Дегенмен, ол тек 2021 жылдың қорытындысы бойынша 18 жасында әлемдік рейтингте екінші орынға жайғасқан франциялық шахматшы Алиреза Фирузджа қарсылас атанған жағдайда ғана чемпиондық тәж үшін күресетінін мәлімдеген болатын. Карлсеннің өкінішіне қарай, Алиреза Фирузджа былтырғы үміткерлер турниріне қатысқанымен, үздіктер қатарынан көріне алмады. Содан кейін, яғни 2022 жылдың шілдесінде норвегиялық гроссмейстер Ян Непомнящиймен шахмат тақтасында ойнаудан бас тартатынын ресми түрде жариялады.
Былтыр Алатау баурайында ұйымдастырылған шахматтан әлем чемпионатының рапид және блиц түрі бойынша қарсылас шақ келтірмей, жеңімпаз атанған 32 жастағы Магнус Карлсен алғаш рет 2013 жылы шахматтан әлем тәжін иеленген болатын. Сол жылы үміткерлер бәсекесінде үздік шығып, чемпиондық тәжді 2007-2013 жылдар аралығында әлемнің 15 дүркін чемпионы атанған үндістандық Вишванатан Анандтан «тартып» алды. 2014 жылы Мангус Вишванатан Анандты тағы да жеңіп, чемпиондық атағын қорғап қалған. 2016 жылы ол ресейлік Сергей Карякинді, 2018 жылы америкалық Фабиано Каруананы және 2021 жылы ресейлік Ян Непомнящийді жеңіп, чемпиондық атағын тағы да үш мәрте сәтті қорғады.
