А.Нұпбай мен А.Арыстанбекова 18 жасқа дейінгі теннисшілер арасында еліміздегі ең табысты жұп саналады. Олар Делидегі турнирдің финалында Тайланд теннисшілерін екі сетте 6:3, 6:2 есебімен тізе бүктіріп, жарыстың бас жүлдесін жеңіп алды. Өткен жылы қазақстандық жұп ITF Juniors сериясында жеті турнирде үздік шыққан болатын. Бұл – Айя мен Асылжанның бірлесе жеңген биылғы бірінші, жалпы 10-титулы.
«Жыл басында жеңіске жеткен маңызды. Қазіргі деңгейіме ризамын, бұдан кейін де бабымда боламын деп ойлаймын. Асылжанға рахмет, додада қиын матчтар болды. Біз содан сәтімен шыға білдік», деді А.Нұпбай.
«Бұл – Айя екеуміздің оныншы титулымыз. Жаңа маусым басындағы табыс тың жетістіктерге жетелейді, күш береді. Федерация мен Team Kazakhstan академиясының барлық бапкеріне алғыс айтамыз», деді А.Арыстанбекова.
