Аталған спорт түрінің 10 шақырымдық спринт бәсекесінде алдына жан салмаған жерлесіміз Бекентай Тұрлыбеков мәре сызығын бірінші кесіп, Универсиада жеңімпазы атанды. Тұрлыбековтен тұп-тура 22,2 секундқа қалып қойған тағы бір отандасымыз Александр Мухин қола жүлдеге қол жеткізді. Екі спортшымыздың ортасына америкалық биатлоншы Бьорн Вестервельт түспегенде, бұл жарыста үш бірдей жерлесімізді жеңіс тұғырынан көруіміз әбден мүмкін еді. Өйткені Кирилл Бауер мен 15 шақырымға жарыста топ жарған Вадим Куралес мәре сызығын Александр Мухиннен кейін кесіп, сәйкесінше 4-5-орындарға жайғасты.
Жарыс жеңімпазы атанған Бекентай Тұрлыбеков аталған қашықтықты 27 минут 51.5 секундта еңсеріп, 41 биатлоншының ішінде оқ ату аймағында бірде-бір рет қателеспеген жалғыз спортшы атанды. Күміс жүлдені мойнына ілген Бьорн Вестервельт оқ атуда екі рет қателессе де, жылдамдығының арқасында екінші орынға табан тіреді. Александр Мухин де оқ ату аймағында екі рет мүлт кетіп, мәреге үшінші болып жетті.
Енді жерлестеріміз бүгін із қуу бәсекесінде бақ сынайды. Бұл жарыс Қазақстан биатлоншыларына жеңілдеу болады. Өйткені олар сөреден кешегі уақыт көрсеткіштері бойынша шығады. Егер, отандастарымыз ату аймағында нысана көздеуден мүлт кетпесе, бұл жолы да жүлдегерлер қатарынан көрінуге зор мүмкіндік туып тұр.
Ал қатарынан төрт турда қарсылас шыдатпаған шайбалы хоккейден Қазақстан студенттер құрамасы бесінші ойында АҚШ хоккейшілеріне есе жіберді. Бұл кездесуде айдын иелеріне жеңіс ауадай қажет еді. Себебі олар өткен турда Словакиядан 5:2 есебімен жеңіліп, турнир кестесінде үшінші орынға түсіп қалған болатын. Сондықтан АҚШ құрамасы плей-офф кезеңіне шығу үшін Қазақстан хоккейшілерін ойынның негізгі кезеңінде жеңуге тиіс еді.
Кездесудің есебін бірінші минутта айдын иелерінен Ханьюолл Мэттью ашқанымен, арада төрт минут өткенде Батырлан Мұратов таразы басын теңестіріп, мұзайдынға жиналған жергілікті жанкүйерлердің көңілін су сепкендей басып тастады. Бірақ екінші кезеңде АҚШ хоккейшілері Андрей Шутов қорғаған қақпаға қатарынан үш шайба соғып, 4:1 есебімен жеңіске жетті. Осылайша, В тобында алғашқы екі орынға ие болған Қазақстан және АҚШ құрамалары плей-офф сатысына жолдама алды.
Медаль көрсеткіші бойынша Қазақстан делегациясы 3 алтын және 1 қола жүлдемен жалпыкомандалық есепте 6-орында келе жатыр. Алғашқы үш орынды Жапония (11 алтын, 11 күміс, 5 қола), Польша (4 алтын, 3 күміс, 3 қола) және Корея (3 алтын, 3 күміс, 2 қола) спортшылары иеленіп тұр.
