Каирде өткен «Ai forum» жастар форумында бірегей жоба таныстырылды. Әлемнің 26 елінен келген ондаған команда өнеркәсіптік революция, жасанды интеллект, блокчейн, өнер және экология саласындағы жобаларымен бөлісті.
Форум 4 күнге созылды. Әртүрлі тақырып бойынша дәрістер мен семинарлар өтіп, оқушылар өзара пікір алмасты.
«Мен жасанды интеллект секциясында жобамды ұсындым. Біздің жоба қазылар алқасы мен көрермендердің жақсы бағасын алды. Осы өнертабыспен былтырдан бері айналысып келеміз. Сондай-ақ осы форумда біз үшін танымдық экскурсия ұйымдастырылды. Бұл шығармашылық бастаманы дамытуға көмектесетіні сөзсіз», дейді жоба авторларының бірі, 12-сынып оқушысы Виктор Кахно.
Виктор Кахно, Максим Сурин, Мирхаят Дени ноу-хауы екінші жыл қатарынан Enactus World Cup студенттік кәсіпкерліктің финалисі атанды. Өткен жылы балаларға NARXOZ университетінің мемлекеттік грантының сертификаттары табыс етілген еді.
Айта кетейік, нашар көретін және зағип жандарға арналған көзілдірік камераның көмегімен, арнайы сенсормен жұмыс істейді. Бұл камераның іске қосылуы үшін оқушылар арнайы бағдарлама кодын жазған. Осылайша, инфрақызыл толқындардың көмегімен технология объектілерге, көліктің кез келген түріне, бағдаршамдарға, жол белгілеріне, велосипедшілер мен адамдарға дейінгі қашықтықты анықтай алады.
Жас өнертапқыштар автономды көзілдіріктердің көмегімен қала бойынша өз бетінше қауіпсіз қозғалуға болатынын айтады. Бұл әдіс зағип жандардың күнделікті өмірін айтарлықтай жеңілдетеді деген қорытындыға келіп отыр.
Жетісу облысы
