![Қонаев тағылымы](/media/2023/01/22/qonaev.jpg)
Рухани-танымы жоғары шығарманы 2014 жылы Қонаев университеті Мемлекеттік сыйлыққа ұсынды. Түрлі себеппен мәреге жетпесе де, жер-жерде аға буын бір-бірінен сұрап оқитын еңбекке айналды. Содан бері оншақты жыл өтті. Астана музыка мектебінің негізін қалаушы, білім ардагері Оспан Сүлейменұлы мен «Тіл және мәдениет» бірлестігінің қайраткері Әнуарбек Ералы: «Сұранысқа ие шығарма бес жыл сайын жарық көріп тұрғаны жөн. «Таңғажайып Қонаевты» Мәдениет және спорт министрлігі мемлекеттік тапсырысқа енгізеді деп сенеміз. Беймәлім себеппен тізімге кірмей, кейінге қала беретіні ойландырады. Рас, Д.Қонаев қаламгер емес, бірақ ол мемлекет қайраткері, әлемге әйгілі тұлға ғой. Сондықтан кітап мемлекет қолдауымен шығуға тиіс еді. Димекеңнің 110 жылдық мерейтойына орай жарық көрмегені қамықтырды», дейді.
Ал қуанышты хабар – Қонаев жылында Түркістан азаматтары осы кітапты Шымкенттегі «Нұр Дана» баспасынан шығарып, халыққа ұсынды. Ғылыми конференцияда оқырманға, жергілікті кітапханаларға таратты.
Түркістан қаласының Әл-Фараби кітапханасында өткен Димекеңе арналған жиында кітап авторы Ораз Қауғабай демеуші болған облыстық мәдениет басқармасына, «Қонаев қорына» риясыз алғысын жеткізді.
Түркістандағы жиында Әсет Қыдырқұл есімді ақсақал: «Қазір өздері аспаннан түскендей Димаш Ахметұлын жамандайтындар да бар көрінеді. Әрине, компартия саясатымен байланыстырып. Астанада бір ақынның осындай олақ сөзін естіп таңғалып едім. Өзі алдында коммунистерді, кейін Қазақстанды қиын жағдайға жеткізгенді жырлағанын тарс ұмытып кеткен... Димекеңнің тазалығы болмысы мен ісінде тұр» деп, бүгінгінің ащы сабағын есімізге салды.
Сондай-ақ таяуда Ақтөбе қаласында Д.Қонаев атындағы мектеп-гимназияда да О.Қауғабай кітабының таныстырылымы сәтті өтті.
Астанада да Д.Қонаев колледжі мен мектебінде кітап авторымен кездесу болып, автор әділетті Қазақстан үшін тұлғатанудың маңызын түсіндірді. Мұғалімдер мен шәкірттердің түрлі сұрағына жауап берді.
Айдар Жанарыс,
журналист