Бір айта кетерлігі, өткен сайлаудың қорытындысы бойынша партиялық тізімдегі әйелдер мен жастарға 30 пайыздық квота беру нормасы жүзеге асырылып, парламенттік оппозиция институты да енгізілді. Биылғы сайлау науқанының ерекшелігі көп.
Олардың қатарына саяси партияларды тіркеу талаптарының едәуір жеңілдегенін атап айтсақ болады. Бұл іс жүзінде жаңа партиялық қозғалыстарға жол ашты. Мәселен, сайлау жарияланған кезеңде «Байтақ» және «Республика» атты екі жаңа партия тіркелген. Партияларды құрудың жаңа тәртібінен бөлек, партиялардың Парламентке кіруіне қойылатын шекті кедергі де төмендетілді.
Осының бәріне бір мандатты сайлау округі бойынша кандидаттардың үгіт-насихат жұмыстары да қосылып, жаңа сайлауда тартысты күшейте түспек. Бір мандатты үміткерлер Мәжілістегі 29 орынға таласады.
Өңірлік деңгейде де айтарлықтай белсенді сайлау науқаны өтуге тиіс. Облыстар және Астана, Алматы және Шымкент қалалары мәслихаттарының депутаттары партиялық тізім бойынша да, бір мандатты округтер бойынша да сайланады. Ал аудандық мәслихат депутаттарын сайлау толықтай бір мандаттық жүйемен өтеді.
Жанар САНХАЕВА,
Стратегиялық зерттеулер институтының жетекші ғылыми қызметкері
