«Жастар рухының» төрағасы Нұржан Жетпісбаев бір аптаға жетер-жетпес уақытта 3 мыңнан астам өтінім келіп түскенін атап өтті.
«Сабақ аптасына бір рет өткізіледі. Ал біз бұл клубтардың жұмысын үйлестіреміз. Қазақ тілін меңгергісі келетін адамдардың бәріне бірдей мүмкіндік беру қажет. Партияның саяси тұғырнамасында жазылғандай, тіліміздің мәртебелі және қажетті қатынас құралына айналуына тікелей мүдделіміз. Тіл үйрену – тиімді әрі қол жетімді болуы керек. Мемлекеттік тіл қазақ қоғамын біріктіретін күшке айналуға тиіс», деді ол.
Ұйымдастырушылардың айтуынша, тіл үйренушілерге жай ғана ынта танытқан мұғалімдер емес, жаңашыл әдістерді меңгерген мамандар сабақ береді.
«Тілді тиімді әдіс бойынша үйретеміз. Біз тек сабақ өткізіп қана қоймай, театр, қазақ фильмдерінің көрсетілімі сынды мәдени орындарда ұлттық мәдениетпен таныстыруды көздейтін түрлі іс-шара ұйымдастырамыз. Қатысушыларымыз тіл үйреніп қана қоймай, қоғамдастығымыздың бір мүшесі болғанын қалаймыз. Қатарымызға барынша көп адам қосылып, қазақ тілін үйренушілердің саны артса екен дейміз», деді Яков Федоров есімді белгілі блогер.
Клуб отырысы «Жастар рухының» Астана, Алматы қалаларында және Абай, Ақмола, Ақтөбе, Алматы, Шығыс Қазақстан, Батыс Қазақстан, Қарағанды, Қостанай, Павлодар, Солтүстік Қазақстан облыстарындағы филиалдарында өтеді.
