Чили теннис федерациясы іріктеу ойындарын өткізу үшін бекерге құмдауыт кортты таңдап отырған жоқ. Себебі Оңтүстік Америка өкілдері жасанды төсеніш пен табиғи шөптегі корттарға қарағанда, топырақ төсеніштегі алаңдарда әлдеқайда жақсы өнер көрсетіп жүргенін жанкүйерлер жақсы біледі. Мәселен, олар кейінгі бес жылда өз елінде екі ойын өткізіп, құмдауыт корттағы екі матчта да қарсыластарын тізе бүктірген. 2018 жылы Чилидің бас шаһары – Сантьягодағы Estadio Nacional – Court Central Anita Lizana спорт кешеніндегі матчта Эквадор құрамасын 3:1 есебімен жеңген болса, былтыр Club de Tenis Union теннис кортында Словения теннисшілерін 4:0 есебімен қапы қалдырған. Енді, міне жарыс қожайындары сол сәттіліктердің жалғасы болсын деп бұл жолғы тағы бір маңызды кездесуін құмдауыт кортта өткізуді жөн санап отыр.
Чили теннисінің тарихы тым тереңде болғанымен, олар бүгінге дейін бар-жоғы бір-ақ рет Дэвис кубогінің финалында бақ сынаған. 1976 жылы Сантьягодағы бас жүлде үшін өткен бәсекеде Италия құрамасымен шеберлік байқасып, күміс жүлдегер атанған. Дегенмен, әлем теннисі тарихында Чилиден шыққан даңқты теннисшілердің қатары аз емес. Атап айтқанда, Оңтүстік Америка өкілдері 2004 жылғы Афины Олимпиадасының екі дүркін чемпионы Николас Массумен (жекелей және жұптық сында), Афины Олимпиадасының жұптық сындағы жеңімпазы және Бейжіңдегі доданың күміс жүлдегері Фернандо Гонсалеспен, әлемнің экс-бірінші ракеткасы Марсело Риос және тағы басқа мықты теннисшілерімен мақтана алды.
Бүгінде Николас Массу жаттықтыратын Чили құрамасы құрамалар арасындағы әлемдік рейтингте 21-орында тұр. Жерлестеріміз олардан 10 саты жоғары орналасқан – 11-орын.
Тынық мұхиты жағалауында орналасқан қалаға Юрий Щукин бастаған Қазақстан құрамасы бірер күн бұрын барып, Александр Бублик, Тимофей Скатов, Михаил Кукушкин, Андрей Голубев және Александр Недовесов алдағы матчқа қызу дайындық жүргізіп жатыр. Бұл кездесу екі ел арасындағы алғашқы матч болмақ.
Қазақстан теннис федерациясының баспасөз қызметіне алдағы ойын туралы пікір білдірген еліміздің бірінші ракеткасы Александр Бублик құмдауыт корттарда ойнап үйренгенін, алдағы матчқа толық дайын екенін айтты.
«Өздеріңіз білетіндей, бұрындары мен үшін топырақ төсеніштегі корттарда ойнау өте ыңғайсыз болатын. Қазір мұндай төсеніштерге әжептәуір бейімделіп қалдым. Құрамадағы жігіттер Чилиге жақсы көңіл күймен келді. Өз еліміздің намысын қорғап, жеңіске жету үшін бар күшімізді саламыз, сондықтан алдағы бәсекеге мұқият дайындалып жатырмыз», деді Қазақстан құрамасының көшбасшысы Александр Бублик.
Чили теннисшілері мына құраммен өнер көрсетеді: Алехандро Табило (ATP рейтингінде 97-орында), Кристиан Гарин (102), Николас Ярри (126), Томас Барриос Вера (№213), Гонсало Лама (332).
Ла-Серена қаласында өтетін Чили – Қазақстан матчы әдеттегідей төрт жекелей кездесуден және бір жұптық бәсекеден тұрады. Әр ойын үш сетке жалғасады. Жарыстың бірінші күнінде құрамалар жекелей сында екі ойын, келесі күні жұптық сында бір, жекелей сында тағы екі матч өткізеді. Бес матчтың қорытындысы бойынша, жеңіске жеткен құрама қараша айында Испанияның Малага қаласында ұйымдастырылатын Дэвис кубогінің финалдық кезеңінде бақ сынау мүмкіндігіне ие болады. Қазақстан жанкүйерлері матчты Qazsport телеарнасынан тікелей эфирде тамашалай алады.
Сондай-ақ Чили мен Қазақстан құрамасынан бөлек, әлем чемпионатының финалына шығу үшін Хорватия – Аустрия, Франция – Мажарстан, АҚШ – Өзбекстан, Германия – Швейцария, Ұлыбритания – Колумбия, Сербия – Норвегия, Бельгия – Корея, Швеция – Босния және Герцеговина, Нидерланд – Словакия, Аргентина – Финляндия және Чехия – Португалия теннисшілері іріктеу матчтарында күш сынасады.
Сөйтіп 12 жұптың жеңімпаздары былтырғы Дэвис кубогінің жеңімпазы Канада мен екінші орын иегері Аустралия, сонымен қатар ұйымдастырушылардан арнайы шақырту алған (wild card) Италия және Испания құрамаларының қатарын толықтырып, 2023 жылғы чемпиондықты сарапқа салады.
