Мобильді қосымша сайтпен толықтай синхрондалған. Қосымша бос жұмыс орындарын іздеуге және жұмысқа орналасуға жәрдемдесіп қана қоймай, жұмыссыз ретінде тіркеліп, жұмысынан айырылуына байланысты әлеуметтік төлем алуға да көмектеседі.
Мәселен, мобильді қосымша арқылы 6,2 мың адам жұмыс іздеуші ретінде тіркелген. Ал 5,7 мың адам жұмыссыз ретінде тіркеліп, оның ішінде 200-ден астамы жұмысынан айырылуына байланысты әлеуметтік төлем алуға өтініш білдіріпті және қосымшаның көмегімен әлеуметтік жәрдемақы алған.
Сондай-ақ қосымшаның көмегімен мемлекет тарапынан субсидияланатын уақытша жұмыс орындарына орналасуға болады. Бұл тізімде әлеуметтік жұмыс орындары, қоғамдық жұмыстар, сонымен қатар «Жастар практикасы», «Алғашқы жұмыс орны», «Ұрпақтар келісімшарты» және «Күміс жас» жобалары бар. Яғни аталған бағыттар бойынша бос жұмыс орындарымен қамтамасыз етіледі.
Enbek.kz қолданушыларды қызықтырған бос жұмыс орындарына жауап беріп, жұмыс берушілерден шақырту да ала алады. Push-хабарландыру функциясының көмегімен түйіндемені қарағаны және оған жауап бергені туралы ақпаратты қадағалауға мүмкіндік бар. Сондай-ақ ол сұхбатқа шақыру және жұмыс берушінің сұхбат нәтижесі бойынша шешімін өткізіп алмауға мүмкіндік береді.
Қолданушылар қосымшаны PlayMarket және AppStore платформаларынан жүктей алады.
