Бокс • 12 Ақпан, 2023

Боксшылар Дебреценде дара шықты

389 рет
көрсетілді
5 мин
оқу үшін

Мырзағали Айтжанов жетекшілік ететін бокстан Қазақстан ұлттық құрамасы Мажарстанда өткен дәстүрлі Иштван Бочкаиді еске түсіруге арналған халықаралық турнирде табысты өнер көрсетті. Бір аптаға жалғасқан байрақты додада жерлестеріміз жалпыкомандалық есепте Украина, Германия, Өзбекстан құрамаларын артқа тастап, топ жарды.

Боксшылар  Дебреценде дара шықты

Мажарстанның шығысында орналас­қан, халық саны бойынша ел астанасы Будапешттен кейінгі қала Дебрецендегі турнирде Қазақстан құрамасының 13 боксшысы шаршы алаңға шығып, то­ғызы жүлдегерлер қатарынан көрінді. Әлем және Азия чемпионаттарынан кейінгі ірі турнирлердің бірі саналатын жа­рыста жерлестеріміз аралас құраммен өнер көрсеткенін айта кеткен жөн. Олар­дың жартысына жуығы ұлттық құра­маның екінші және үшінші нөмірлі бокс­шылары. Сондай-ақ Дебрецендегі тур­­нирде Серік Теміржанов, Айбек Орал­­бай секілді көшбасшы жігіттер де бақ сынады.

Жарыс қорытындысы бойынша, 51 кило салмақтағы ел чемпионы, әскерилер арасындағы әлем біріншілігінің күміс жүлдегері Дамир Әбдіқадыр, былтырғы ел чемпионатының қола жүлдегері Дәулет Молдашев (54 кг) және жастар арасындағы Азия чемпионы, әлем бірін­шілігінің қола жүлдегері Ермахан Жак­пеков (71 кг) Мажарстандағы турнирдің қола жүлдегері атанды.

Ал жарыстың финалында өнер көрсеткен алты жерлесіміз ақтық бәсе­кеде барлық қарсыласын тізе бүктіріп, Де­бреценде мықтылығымен даралан­ды. Атап айтар болсақ, аса жеңіл сал­мақтағы ел біріншілігінің бірнеше дүр­кін жеңімпазы, 2021 жылғы әлем чем­пионы Теміртас Жүсіпов (48 кг) финалда Қырғызстан боксшысы Асылбек Аманкулуулунан айласын асырса, Сер­биядағы әлемдік доданың күміс жүл­дегері Серік Теміржанов (57 кг) 2022 жылғы Еуропа чемпионы бельгиялық Ва­силе Устуройді төрешілердің бірауыз ше­шімімен қапы қалдырып, турнир же­ңімпазы атанды. Сондай-ақ жас­тар арасындағы Азия чемпионы, ел бірін­шілігінің жеңімпазы Саматәлі Төлтаев (60 кг) финалда аустралиялық Фред Дз­зивамен қолғап түйістіріп, айқын басым­дықпен ұтты. Тіпті жерлесіміз бірінші раундта қарсыласын нокдаунға жіберді. 75 килодағы Аятулла Тәкіжанов Украина өкілі Иван Папкинмен тартыс­ты жекпе-жек өткізіп, төрешілердің аралас шешімімен жеңіс тұғырынан көрінді. Ал 67 килодағы Дулат Бекбауов пен 92 ки­лодағы Айбек Оралбай жекпе-жексіз-ақ чемпион атанды. Олардың финалдағы қар­­сыластары рингке шығудан бас тартты.

Осылайша, Қазақстан ұлттық құра­масы 6 алтын, 3 қола жүлдемен жалпы­ко­мандалық есепте көш бастады. Ен­шісінде 10 медаль (3 алтын, 3 күміс,

4 қола) бар Украина боксшылары екінші орын­нан көрінсе, Германия жеті медальмен (2 алтын, 2 күміс, 3 қола) үздік үш­тікті түйін­деді. Ал Өзбекстан (1 алтын, 2 күміс, 3 қо­ла) мен Қырғызстан (1 алтын, 1 күміс) бокс­­шылары төртінші және бесінші орынға жайғасты.

Сонымен қатар Мароккодағы «Golden Belt Series Marrakesh» («Алтын белбеу») халық­аралық турниріне қатыс­қан еліміздің қыздар құрамасы да жал­пы­командалық есепте үздік шықты. Ма­рокконың Мар­ракеш қаласында ұйым­дастырылған ха­лықаралық жарыс­та әлемнің 34 елі­нен келген ең үздік был­ғары қолғап шебер­лері бақ сынады. Қазақстан құрамасы са­пынан 12 бұрымды боксшы өнер көр­сетіп, 10 медаль жеңіп алды.  Оның ішінде бесеуі – алтын, екеуі – күміс, үшеуі – қола.

Халықаралық турнирде ел құрама­сының үздіктері – Алуа Балқыбекова (48 кг), Назым Қызайбай (50 кг), Жай­на Шекербекова (54 кг), Карина Ибра­гимова (57 кг) және Валентина Халь­зова (75 кг) алтыннан алқа тағынып, қазақ елінің Әнұранын шырқатса, финалда қарсыластарына жол берген Аида Әбікеева (63 кг) мен Ләззат Күнгейбаева (+ 81 кг) күміс медальға ие болды. Ал На­дежда Рябец (66 кг), Мәдина Нұр­шае­ва (70 кг) және Фариза Шолтай (81 кг) қола жүлдегерлер қатарынан көрінді.

Өкінішке қарай, былтырғы Азия чемпионатының қола жүлдегері Жазира Орақбаева (52 кг) мен 2021 жылғы сары құрлық додасының финалисі Владислава Кухта (60 кг) жүлдесіз қалды.

Жалпыкомандалық есепте Ресей құра­­масы екі алтынмен екінші орынға ие болса, бір мәртеден жеңіс тұғырына кө­терілген Италия, Тайвань, Мозамбик және Марокко құрамалары кейінгі орындарды өзара бөлісті.