Бір ғана мысал. Жақында Өскемен қаласындағы «Империя» бильярд клубында өңірдің экономикасы, мәдениеті мен спортының дамуына өзіндік үлес қосқан, облыс, аудандарды басқарып тұрған кезінде жағымды жаңалықтармен жерлестерін қуантқан мемлекет және қоғам қайраткері, Қазақстан Республикасы «Әлем қырандары» бильярдшылар қоғамдастығы Шығыс Қазақстан облыстық филиалының төрағасы Түсіпхан Түсіпбековтің 70 жылдық мерейтойына арналған турнир өтті. Оны өткізуге Қазақстан Республикасы Бильярд спорты федерациясы Шығыс Қазақстан облыстық филиалының директоры Серік Ақтанов мұрындық болды. Реті келгенде айта кету керек, спорт десе ішкен асын жерге қоятын іскер азаматтың бастамасымен Өскеменде бильярдтан Азияның ашық чемпионаты, жазушы Қабдеш Жұмаділовті еске алуға арналған турнир, бірнеше халықаралық, облыстық жарыстар өтіп, бильярд спортын жандандыратындар қатары арта түсті. Серік Қасымбекұлы жетекшілік ететін федерацияның мүшелері Астана, Алматы, Шымкент, еліміздің басқа да қалаларында өтетін жарыстардың көрігін қыздырып, жүлделі орындарды иеленіп жүр.
Түсіпхан Түсіпбековтің турниріне 23 тастаяқ шебері қатысты. Олардың арасында Түсіпханның достары, замандастары, бильярд спортын насихаттаушы ардагерлер болды. Алматыдан Түсіпханның досы, Жазушылар одағының басқарма төрағасы Ұлықбек Есдәулет, Астанадан мемлекет және қоғам қайраткері, ел спортының дамуына елеулі үлес қосып жүрген Сәдібек Түгел, облыстық драма театрының директоры Руслан Қайырсынов, мерейтой иесінің кіндік қаны тамған Тарбағатайдан делегацияны басқарып келген аудандық ішкі саясат бөлімінің басшысы Ермек Құрманғалиев, тағы басқа азаматтар ақжарма тілектерін айтып, ата салтымен мерейтой иесінің иығына шапан жапты.
Облыстық төтенше жағдайлар басқармасында ұзақ жыл басшы болған полковник Алмас Уәлиев қазір де бабында екенін дәлелдеді. Бильярдпен ұзақ жыл шұғылданып жүрген ол шеберлігін паш етіп, чемпион атанды. Николай Рыжих, Қайрат Әділбеков, Бадри Джебесов жүлделі орындарды бөлісті. Оларға федерация басшысы Құрмет грамоталарын тапсырды. Астана мен Алматыдан, аудандардан келген қонақтар тағылымы мол турнирді өткізген азаматтарға алғысын айтты. Ал мерейтой иесі алдағы уақытта да бильярд спортын дамытуға үлес қоса беретінін жеткізді.
Оңдасын ЕЛУБАЙ,
Қазақстанның құрметті спорт қайраткері
Өскемен
