Дәстүрлі турнирдің алғашқы жарыс күнінде шаршы алаңға шыққан 60 килодағы былтырғы ел чемпионатының күміс жүлдегері Ерасыл Таңқай Италияның даңқты боксшысы Даниэле Салерномен қолғап түйістіріп, қарсыласын техникалық нокаутпен тізе бүктірді. Жекпе-жек басталған сәттен басымдықты өз қолына алған отандасымыз үшінші раундта Салерноны бір теңселтіп алды. Кейіннен төреші кездесуді тоқтатып, қазақ боксшысының жеңіске жеткенін мәлімдеді.
Қазақстан жанкүйерлері кеше күндізгі сессияда (17:00) 57 килодағы Оразбек Асылқұлов пен Джуд Галлахер (Ирландия), 63,5 кило салмақтағы Ертуған Зейнуллинов пен Конде Ойер Ибаррече (Испания), кешкі сессияда (22:00) 54 килодағы Бекзат Алдамжаров пен Биллаль Беннама (Франция), 67 килодағы Темірхан Тезек пен Пламен Янков (Болгария) және 86 килодағы Бекзат Таңатаров пен Картик (Үндістан) арасындағы кездесулерді тамашалады.
