– Канада мен Қазақстан арасы алыс болғанымен, көптеген жақындығы бар. Мысалы, екі ел жер көлемі жағынан ауқымдылығымен, климаттық ұқсастығымен ерекшеленеді. Табиғи ресурстарға – гидроэнергетика, ауыл шаруашылығы әлеуетіне, пайдалы қазбаларға бай. Канаданың ауыл шаруашылығында ақпараттық және коммуникациялық технологиялар ерекше рөлге ие, – деді Алан Хамсон.
Ақылбек Күрішбаев Канаданың жетекші жоғары оқу орындары мен компанияларын агрономия, селекция, егіншілік, зооинженерия, ветеринария және ауыл шаруашылығы саласында ғылыми зерттеулер жүргізу бағытында бірлескен білім беру бағдарламаларын әзірлеп, іске асыруға шақырды.
– Біздің елдердегі агробизнес саласы жаңа прогрессивті технологияларды пайдалана отырып бәсекелестік жағдайында дамып келеді. Осыған байланысты канадалық технологиялар мен ноу-хауды қолданатын агроөнеркәсіп кешені үшін кадрларды даярлаудағы ынтымақтастық әлеуетін дамытуды мақсат етіп отырмыз. Бұл ретте Саскачевана университетімен агрономия бойынша бірлескен білім беру бағдарламасын әзірлеуді ұсынамыз, – деді А.Күрішбаев.
Канададағы Саскачевана университеті (UofS) әлемдегі биомедициналық ғылымдар, жаратылыстану ғылымдары, инженерия және технологиялар, әлеуметтік ғылымдар және менеджмент саласындағы үздіктердің қатарына кіреді.
Кездесу аясында Қазақ ұлттық аграрлық зерттеу университетінің басшылығы зооинженерия, генетика және жануарлар селекциясы бойынша білікті мамандарды даярлауға баса назар аудара отырып, Канаданың жетекші жоғары оқу орындарының қатысуымен бірлескен жоба жасауды ұсынды.
Сонымен қатар Альберт университетімен бірлесіп магистранттарға арналған «Өсімдіктер туралы ғылым» бірлескен білім беру бағдарламасын әзірлеу, «Болашақ» бағдарламасы бойынша студенттерді тағылымдамадан өткізу және оқыту, жетекші профессорлар мен ғалымдарды шақыру, жоғары оқу орындары арасында ынтымақтастықты дамыта отырып, Қазақ ұлттық аграрлық зерттеу университеті базасында аграрлық-өнеркәсіптік кешен саласында Канаданың жетекші университетінің филиалын ашу мүмкіндіктерін қарастыру қажеттігіне назар аударды.
Аграрлық университеттің оқу-өндірістік базасымен танысқан Канада елшілігінің өкілдері ұсыныстарға қызығушылық білдірді.
АЛМАТЫ
