Бұл елордалық ұжымның осы маусымдағы 40-жеңілісі болды. Жерлестеріміз мұның алдында Омбыда «Авангардпен» кездесіп, «Шығыс» конференциясының үздігіне еш қарсылық көрсете алмаған-ды. Новосибирьдегі 7 400 жанкүйер сыятын «Сибирь» мұзайдыны кешеніндегі матчта да Андрей Скабелканың шәкірттері жігерсіздік танытты. Бірінші кезеңде айдын иелерінен Денис Голубев 3 және 17-минуттарда дубльдің авторы атанса, арада 30 секунд өткенде Тревор Мёрфи нысананы дәл көздеп, матчтың тағдырын алғашқы кезеңде-ақ шешіп тастады. Үзілістен кейін Никита Михайлис (29) пен Егор Петухов (39) есеп айырмасын бір шайбаға дейін қысқартқанда, «Барыс» жанкүйерлерінің кеудесінде үміт оты оянғандай еді. Бірақ мұнымыз бекер екен. Үшінші кезеңнің орта тұсынан ауғанда Владимир Бутузов мергендігімен көзге түсіп, командасына жеңіс сыйлады – 4:2.
Жерлестеріміз бүгін ҚХЛ-дағы соңғы ойынын елордада Ярославльдің «Локомотив» клубымен өткізіп, биылғы маусымды аяқтайды.
