Саясат • 02 Наурыз, 2023

Ұйыммен ұтымды байланыс

335 рет
көрсетілді
3 мин
оқу үшін

Біріккен Ұлттар Ұйымының Азық-түлік және ауыл шаруашылығы ұйымының (FAO) жобалары біздің елдегі агрокешенді қолдауға бағытталмақ.

Ұйыммен ұтымды байланыс

Қазақстандағы байланыс жә­не әріптестік жөніндегі FAO бюро­сының басшысы Қайрат Нәжі­миденовтің айтуынша, біздің ел бұл ұйымға 1997 жылы мүше боп қабылданған. Ұйымның мақсаты – әлемдегі азық-түлік қауіпсіздігін қамтамасыз ете отырып, халықтың жоғары сапалы тағамға тұрақты қол­жетімділігіне кепілдік беру. Сондай-ақ ұйымға мү­ше мемлекеттерге ауыл шаруа­шылығы секторына қолдау көрсету.

– FAO басшылығы нақты өзге­ріс­терге қол жеткізу үшін инвес­тицияларды ұлғайту, инновацияларды дамыту және бүкіл әлемдегі фермерлерді қолдау жөніндегі әрекеттерге назар аудару сияқты үш не­гізгі шартқа басымдық беріп отыр. Кейінгі жылдары ұйым ғалымдарға, студенттерге, магистранттарға арналған бір­қатар оқыту семинарын және фермерлерге ғылым мен техникаға инновациялар енгізу бойынша тренингтер өткізіп келеді. Мұндай жобалар Қазақ ұлттық аграрлық зерттеу университетінің базасында да жалғасын табады, – деді Қ.Нәжімиденов Қазақ ұлттық аграрлық зерт­теу университетінің бас­шылығымен болған кездесуде.

Еліміздегі FAO бағдар­ла­ма­ларының үйлестірушісі Жаңыл Бозаева нысаналы қорлардың жобаларының азық-түлік секторы мен ауыл­дарды дамыту, орман жә­не балық шаруашылығын жақсарту әрі қалпына келтіру, жер және су ресурстарын тұрақты басқару, климаттың өзгеруін ескере отырып ресурс үнемдеу технологияларын енгізу бағытындағы жұмыстарының нәтижесіне тоқ­талды.

Қазақ ұлттық аграрлық зерт­теу университетінің рек­торы Ақылбек Күріш­­баев халық­ара­­лық ын­ты­­мақтастықты дамыту уни­вер­ситеттік білім беруді халықаралық деңгейге сәй­кестендірудегі маңызды қадам екенін айтты.

– Қазақ ұлттық аграрлық зерт­теу университетінің халық­аралық қызметі жоғары білім беру жүйесіндегі университет мәртебесін арттыруға және әлемдік білім беру қо­ғам­дастығына қосылуға ба­ғытталған. Бәсекеге қабілетті кадрлар даярлау, ірге­лі және қолданбалы зерттеулер жүр­гізуді мақсат етіп отыр­ған­дықтан, агроөнеркәсіп инно­ва­цияларын дамыту және фермер­лерді қолдау бойынша FAO-мен ынтымақтас­тық­қа мүдделіміз. Білімді практика мен оқу үрдісіне тарату арқылы агроөндірістің дамуына ықпал ететін озық тәжірибелер мен технологияларды тара­ту үшін ғалымдар, ауыл ша­руа­­­­шылығы өнеркәсіптік кешен мен жоғары оқу орын­да­ры­ның өзара іс-қимылын үйлестіруіміз қажет. Ұлт­тық аграрлық зерттеу универ­си­тетінде халықаралық білім бе­ру бағдарламаларын дамыту үшін барлық жағдай жасалған, – деді А.Күрішбаев.

Кездесуге FAO ауыл ша­руа­шы­лығы саясаты жөнін­дегі аға сарапшысы Лилия Мусина, бағдар­ламалық талдаушысы Самат Қайырбеков және университет ғалымдары қатысып, әлемде азық-түлік жетіспеушілігінің, аштықтың алдын алу, инновациялық ғылыми жобаларды әзірлеу мен іске асыруды талқылады. Осы орайда extension жүйе­сінің әлеуетін арттыру, фермерлер үшін біліктілікті арт­тыру жүйесін құруда ұлт­тық университеттің ғылы­ми-техноло­гиялық инфра­құрылымын пайдалану, кадр­ларды даярлау сияқты маңызды бағыттарды да FAO-мен бірлесе жүзеге асыру маңызды.

 

АЛМАТЫ