Дүйсенбі күні кешке әлем чемпионатының үшінші турын Голландия мен Чили құрамалары бастады.
Негізі командалардың топтық кезеңдегі соңғы ойындарын ережеге сәйкес, «А» тобының құрамалары бастау керек еді. Алайда, ФИФА ешкімге түсіндірместен Бразилия – Камерун матчын кейінге шегерді. Халықаралық футбол федерациясының бұл шешімін Голландияның бас жаттықтырушысы Луи Ван Галь сынға алды. Ол ФИФА-ның шешімі алаң иелерінің «өтініштерін» ескеріп, Голландия мен Чили кездесуінің нәтижесін білу үшін әдейі жасалғанын, өйткені, Бразилия Голландиямен 1/8 финалда кездескісі келмейтінін айтты. Бұл жерде Ван Гальдің сөзінің жаны бар.
Жалпы, әлем чемпионаты кезінде жарысқа қандай да бір өзгерістер енгізу дұрыс емес. Мұндай жағдай 1982 жылы Испанияда өткен әлемдік додада да болғанын білеміз. Енді, міне, арада 32 жыл өтсе де сол жағдай тағы қайталанып отыр. Содан ФИФА-ның ешқандай сабақ алмағанын да көріп отырмыз. Өкінішті, әрине. Басқа айтарымыз жоқ. Ал, Бразилия болса мақсатына жетті. Голландия мен Чили арасындағы ойын 2:0 есебімен аяқталысымен қамшыны басты-ау. Камерунды 4:1 есебімен ұтты. Сөйтіп, «А» тобында бірінші орынмен 1/8 финалға шықты. Енді олар плей-оффта Чили құрамасымен кездеседі. Ал Голландия Мексика командасымен күш сынасады. Мексика Хорватияны 3:1 есебімен жеңсе де доп айырмашылығы бойынша Бразилияға жете алмай, топта екінші орын алды.
Тағы айтатын бір нәрсе, Бразилия қаншама рет Голландиядан қашқақтаса да екеуі 1/8 финалда қарсыластарын жеңсе ширек финалда кездесуі мүмкін. «Қызықтың көкесін қуырдақ пісіргенде көреміз» демекші, сол кезде Бразилияның көкмайса алаңында кескілескен бір шайқастың болатыны сөзсіз.
Осы күні «В» тобында ойындардың көлеңкесінде қалған тағы бір матч өтті. Испания Австралия командасын 3:0 есебімен ұтты.
Қазір Коста-Рика, Франция, Бельгия, Аргентина, Колумбия командалары екінші турдан кейін 6 ұпай жинап, келесі айналымға жолдама алды. Әсіресе, Коста-Риканың Италияны 1:0 есебімен жеңіп, «D» тобында бірінші орынмен 1/8 финалға шыққаны үлкен жаңалық болды. Коста-Риканың осы жеңісін тарихи жеңіске, сенсацияға балап жатқанын айту керек. Ал негізі, біздің ойымызша бұл жеңісті сенсация деуге де болмайды. Коста-Рика әлемдік додаға ара-тұра қатысып, плей-офф кезеңіне шығатын команда. Егер мәселе Италияны жеңгеніне тіреліп тұрса, онда Коста-Риканың жеңісіне еуропалықтардың өздері кінәлі.
Жалпы, биылғы чемпионатта командалардың жеңілісіне жарысқа дайындығы ғана емес, ауа райының да әсері бар. Коста-Рика осылайша екі ойында өздеріне үйреншікті климатта жеңіске деген жігерінің арқасында қарсыластарын ұтты. Енді «D» тобында Уругвай мен Италия арасында өтетін кездесуде қай елдің жарысты жалғастыратыны белгілі болады. Бұл командалар кеше кешкісін кездесті.
«Е» тобында Францияның бірінші орын алғанын айттық. Осы топта Швейцарияның 1/8 финалға шығуға мүмкіндігі көп. Олар Гондурасты жеңсе, келесі айналымға шығады. Ал Эквадордың Францияны жеңуі қиын.
«F» тобында Нигерия мен Иран тағы бір жолдамаға таласады. Егер парсы елі Боснияны ұтып, африкалықтар Аргентинадан жеңілсе, онда Иран 1/8 финалға шығады. Ал Нигерияға жолдама алу үшін тең ойнаса да жеткілікті.
«G» тобында Германия мен АҚШ құрамаларының мүмкіндігі көп. Екеуінің де төрт-төрттен ұпайлары бар. Егер бір ұпайы бар Гана келесі айналымға шыққысы келсе, Португалияны ұтып, АҚШ-тың «неміс машинасынан» жеңілгені керек. Ал Португалия туралы айтпай-ақ қояйық. Олардың мүмкіндігі 90 пайыз жоқ деуге болады.
«Н» тобында Алжир, Ресей және Корея жолдамаға таласып жатыр. Бұл топта Бельгияның 1/8 финалға өткен аптада шығып алғанын білеміз. Осы командалардың арасында Алжирдің мүмкіндігі көп сияқты. Олардың жеңіске деген құлшынысы, жігері тым күшті болып тұр.
Дастан КЕНЖАЛИН,
«Егемен Қазақстан».
