Дәстүр • 05 Наурыз, 2023

Қырағы құсбегілер

313 рет
көрсетілді
2 мин
оқу үшін

Құсбегілік – ұлтымыздың қанына сіңген ұлы дәстүр. Көшпенділердің өміріне тағантас болған берік өнер. Содан да болар тәлім-тәрбиесі атадан балаға қастерлі қалпымен жарасымды жалғасып та келеді. Оған дәлел, Жетісуда өткен республикалық саятшылар жарысы. Аушы құсты қолға ұстап қырағылық көрсеткен бүркітшілер бәсекесі елді сүйіндірді.

Қырағы құсбегілер

Құсты баулып аңға салу әркімнің пешенесіне жазыла бермейтін қадірлі де қасиетті өнер. Сондықтан да дәстүрлі қазақ қоғамында оның алар орны ерек. Жетісу өңірі өз ал­дына жеке облыс болғалы алғаш рет құсбегілерді бір ша­ңы­рақ астына жинап, ұлт­тық ойын­ның көркін қыздырды.

Ескелді ауданына қарас­ты Жетісу ауылының қысы жан­­ға жайлы, қоңыр салқын, спорт­тық іс-шаралар өткізу­ге өте ың­ғайлы. Мұны көр­ген Қазақстан құсбегілер федерациясының жауапты ма­мандары саясатшылық жарысын өткізуге осы жерді таң­дапты. Жарыстың қолайлы өтуіне барлық жағдай жасал­ған. Бұл игілікті істі облыстық дене шынықтыру және спорт басқармасы мамандары мо­йынға алып, барынша абы­роймен өткізуге тырысты. Со­лай болды да.

Құсбегілердің жыл са­йынғы жауапты жарыстары Алматы облысының На­рын­қол өңірінде өтетін. Өңір екі­ге бөлінгеннен кейін, дәс­түрлі доданы өткізу кезегі жеті­су­лықтарға бұйырды. Сол күні табиғатта тосын мінез танытпады, күн де күлімдеп тұрды.

Жастар арасындағы құс­бегілердің ХІV республика­лық чемпионатына Алматы, Түркістан, Абай, Атырау, Маң­ғыстау, Шығыс Қазақстан об­лыстары мен Астана және Алматы қаласының құсбегі­лері қатысты. Ашылу салтана­тына жиналған ағайынның қарасы көп болды. Екі күнге созылған жарыс елдің есінде қалды. Балапан күнінен бап­таған әртүрлі аңшы құстың айла­сы, бітім-болмысы, мінезі көп­шілікті таңдай қақтырды.

Жарыс соңында ең үз­дік көрсеткіштерге ие бол­ған жеңімпаздар арнайы жүл­­делерге ие болды. Бүр­кіт­шілер ара­сында Атырау облысы­нан келген Иманғали Әбді­кәрім­ұлы чемпион болса, қаршыға салуда Алматы облысының өкі­лі Сейітжан Бексұлтан үз­дік атанды. Ителгі салудан Түр­кістан облысынан келген Мүсәлім Салманға тең келер құсбегі болған жоқ.

Ал Түркістан облысының құсбегілері 1 алтын, 1 күміс, 2 қола медальға ие болды. Аты­рау және Алматы облысының өкілдері бір-бірден алтын ме­даль­ды жеңіп алды.

 

Жетісу облысы