Өнер • 06 Наурыз, 2023

Меруерттің моншақтары

406 рет
көрсетілді
2 мин
оқу үшін

«Құралай көз, қолаң шаш,
Алма мойын, қиғаш қас». Иә, әдемілік – әйелге тән. Көктемнің қызғалдағындай құлпырып кететін қыз-келіншектердің ажарын ашатын алқа, жүзік, сыңғырлы сырғасын жасауда өзіндік өрнегін қалыптастырған, бәсекелестікте бәсі жоғары қолөнер шебері Меруерт Ермекованың «Алтын тас» аталатын брендтік бұйымдары әрдайым сұранысқа ие.

Меруерттің моншақтары

Табиғаты көркем Талғар қала­сында тұратын Меруерттің көрер көз қызығарлық сәу­келеден бастап, білезік, шекелік, өңіржиек, алқа, шашбау сынды әшекей бұйымдары еліміздің әр түкпіріне жөнелтіледі. Сондай-ақ моншақтан жа­салған әдемі әшекейлері жыл сайын кітапханалар мен жо­ғары оқу орындарында, мек­тептер мен музейлерде ұйым­­дастырылатын қолөнер шеберлерінің көрмелерінен орын алып, көрермен ықы­ласына бөленіп жүр.

ава

– Дүниеге келгенімде ата-анам Меруерт Өтеке­шо­вадай актриса болсын деген ырыммен есімімді Меруерт қойыпты. Бірақ актриса емес, ұстаздық жолды таңдадым. Уақыт өте келе жүрек түк­пі­рімдегі қолөнерге деген қы­зығушылығым артып, бір­жола осы кәсіпті дөңгелетуге бет бұрдым. Әйелдердің әше­кей бұйымдарын жасаумен айналысқаныма да он жылға жуықтапты, – деген қолөнер ше­берінің осы жылдарда жа­са­ған жүздеген бұйымы өз тұты­нушыларын тапқан.

«Саусақ бірікпей – ине ілік­пейді». Шеберқол ана­ла­ры­мыздың игі мұраларын ұр­пақтан ұрпаққа жібін үзбей жеткізуде ұлағатты іс тынды­рып жүрген Меруерт Үсен­бек­қызы іске икемді қыздарға ақыл-кеңес беруден аянбайды.

– Бұрымдыларымыз уа­қытты бекер өткізбей, көненің көзіндей болған кәсіпті замануи үлгіде жаңғыртып, жал­ғастыруға ниет­тенсе неге қуан­­басқа? Көп бол­мағанмен ара-тұра қызыққан қыздар келіп, тастарды тізіп, моншақ, білезік, басқа да бұйым­дарды жасаудың жолдарын үйрене жүріп, қолғабысын тигізгенде «үйренгенің өзіңе жақсы, іс­тегенің маған жақсы» дейтін аналарымыздың ақы­лы еске түседі. Жалпы, тас­тар­­дың қа­сиетіне сенетін ырым­­шыл ха­лықпыз ғой. Сол се­­бепті таст­ардан түзілетін тәспі, білезік, тұ­марға сұраныс жоғары. Көбіне нефрит, шунгит, янтарь, маржан тастарды пайдала­намын. Нефриттің түсі жасыл болғандықтан «мұсылман тасы» деп аталады. Мысалы, ян­тарьды зоб ауруына пайдалы деп есептесе, шунгитке ер адам­дардың қызығушылығы жоғары, – дейді өз ісінің шебері.

Нәзік саусақтарына ілінген әр тасты жоғары талғаммен үйлестіре отырып тізіп, бүтін бір бұйым құрап шығару үшін аса төзімділік пен ептілік қа­жет-ақ. Ал бұл өз ісін ай­рық­ша сүйетін Меруерттің ең асыл қасиеттері десек асыра айт­қандық емес.

 

Ұлбосын ИСАБЕК,

журналист

 

Алматы облысы,

Талғар ауданы