Қазір орталықта 331 қарт тұрады екен. Олардың арасында I, II топтағы мүгедек жандар, яки зейнеткерлер бар. Мекеме қызметкерлері қарттарға медициналық, психологиялық, еңбек терапиясы, құқықтық, экономикалық және басқа да бірнеше әлеуметтік қызмет түрін ұсынады. Қариялар жыл сайын атаулы мерекелерден құр қалмай, мәдени іс-шараларға қатысады.
Осы жолы ақсақал аталар мен ақ жаулықты аналардың құрметіне Мемлекеттік күзет қызметі оркестрінің өнерпаздары концерт қойды. Оркестр құрамында Айзат Қарабекова, Асылхан Шалқаров, Еркебұлан Сəрсенбеков, Гүлсім Мырзабекова, Бауыржан Нұрмұханов сынды халықаралық және республикалық өнер байқауларында төбе көрсетіп, топ жарған мәдениет саласының майталмандары болды. Жезтаңдай әншілер оркестрдің сүйемелдеуімен қазақ және орыстың дәстүрлі әндерін бірінен соң бірін құйқылжыта шырқады. Ізінше жиылған көпшілік шебер күйшілердің күй тартысына тәнті болды. Қонақтардың талабы мен талантына куә болған қарттар өнерпаздарға алғыс айтып, қошемет көрсетті. Ал Президент іс басқармасы ұйымдастыру-бақылау және кадр жұмысы бөлімі меңгерушісінің орынбасары Шолпан Жұмағұлова қарттарға алғыс айтты.
– Жаңа жылдың бастауы болған Наурыз мерекесі құтты болсын! Қазақ халқының қашанда үлкенге құрмет, кішіге ізет көрсете білетін қасиетін білесіздер. Бүгін Президент Іс басқармасының ұжымы мен оған қарасты ведомстволар өздеріңізге келіп, сый-сияпат көрсетуді ойластырған еді. Сіздер елдің өркендеуіне, дамуына зор үлес қостыңыздар. Сіздерге зор денсаулық, ұзақ ғұмыр тілеймін, деді ол.
Орайлы сәтте Президент Іс басқармасына қарасты Президент Әкімшілігі мен Үкіметінің әкімшілік ғимараттары дирекциясы, Мемлекеттік резиденциялар дирекциясы, Медициналық орталық ауруханасы және Материалдық-техникалық қамтамасыз ету басқармасының Әкімшілік ғимараттар дирекциясының қызметкерлері Наурыз дастарқанын жайды. Осы күні Президент Іс басқармасының мамандары өзінің жеке қорынан әкелген кітаптарын «Шарапат» орталығының кітапханасына тапсырғанын да айта кеткеніміз ләзім.
«Шарапат» әлеуметтік қызмет көрсету орталығында бөлім меңгерушісі болып еңбек ететін Сәуле Қайырованың айтуынша, Президент Іс басқармасының ұжымы орталыққа жылына кемінде бір мәрте қайырылып, қарттардың көңілін көтеруге ықылас танытады екен.
– Орталықта әр мерекені өз деңгейінде атап өтеміз. Президент Іс басқармасы жыл сайын келеді. Мекемеде 16 ұлттың қарттары тұрады. Барлығы бір отбасындай тату-тәтті өмір сүреді. Орталықтың жаңа, кең ғимараты 2007 жылы пайдалануға берілді. Мұнда акт залы, медициналық бөлім, жаттығу залы, музейден басқа да қызмет көрсететін бөлімдер бар. Қысқасы, қарттарға жақсы жағдай жасалған. Ұлы Отан соғысының ардагері 98 жасқа қараған Раиса Сафончива да осында тұрады. Ол соғыста пошташы болған. Қазір қызы Ресейде, дейді бөлім меңгерушісі.
Президент Іс басқармасының ұжымы концерттік бағдарламадан кейін де қарттардың тұрмыс ахуалымен танысып, емен-жарқын әңгімелесті.
