Қолөнершілердің туындылары орналастырылған көрмені тамашалағандардың қатарынан табылған Тараз қаласының әкімі Бақытжан Орынбеков ұлттық таным мен дәстүрден қол үзбеген өңірде мұндай іс-шаралар жиі өтуі керектігін айтты.
– Қазақтың ою-өрнек өнері – әлімсақтан бері халқымызбен жасасып келеді. Сан ғасырлық тарихымен біте қайнасқан бұл өнер түрі халықтың шынайы рухани танымымен де астасып жатыр. Ою-өрнек – қазақ елінің мәдени дамуының шежіресі. Оның көне атауы – халықтың тарихы мен мәдениетін, ұлттық ерекшелігін, дүниетанымын сипаттайды.
Қазіргі жаһандану дәуірінде біздің қазақы ою-өрнегіміздің біршама түрі ұмытылып барады. Бұл көңіл қынжылтар жағдай. Себебі бүгінгі өскелең ұрпақ қазақтың осы баға жетпес құндылығының маңызын түсініп, санасына тоқуы қажет.
Бүгінгі фестивальге қатысушылар ұмыт болған ұлттық құндылығымызды ұлықтап, жас буынның санасына сәуле ұялатады деген сенімдемін.
Жалпы, бұл іс-шара мыңдаған жылдар бойы қалыптасқан ұлттық ою-өрнектерімізді мына алмағайып заманда аман сақтап, жастарымыздың бойында жаңғыртуға бағытталып отыр. Сондықтан фестивальге қатысқан барша аналарға алғысымды білдіремін, – дейді Б.Орынбеков.
Фестиваль соңында байқау жеңімпаздары мен жүлдегерлері арнайы марапаттарға ие болды.
Фестиваль аясында «Шапағат» медалінің иегері, кәсіпкер Анар Бексұлтанова мен шәкірттерінің туындылары көпшілік назарына ұсынылып, шеберлік сыныбы ұйымдастырылды.
Тараз
