Скандинавия түбегінде Қазақ елінің намысын мына допты хоккейшілер қорғады: Қақпашылар – Вячеслав Горчаков пен Бержан Ахметжанов. Алаңдағы ойыншылар – Еламан Әліпқалиев, Ершат Амангелдиев, Нұрбол Бөкешов, Петр Грибанов, Денис Максименко, Болат Мұхит, Дәурен Оралов, Антон Свешников, Ескендір Нұғманов, Никита Яров, Самат Аманшин, Рауан Исалиев, Қуаныш Теміралин, Сұлтан Қадыржанов, Евгений Медведев және Максим Утебалиев.
Қазақстанның допты хоккейшілері тұсаукесер кездесуін Суоми елінің өкілдерімен өткізді. Кезінде осы командамен терезесі тең ойнаушы едік. Бірақ соңғы жылдары олар қатты күшейген екен. Ал біз болсақ, керісінше, кері кетіп барамыз. Бәсеке басталған бетте тізгінді мықтап қолға алған финдер қақпамызға үш доп соқты. Бұл голдардың авторлары – Джимми Хейнонен, Яаоко Хивонен және Эмиль Федоров. 37-минутта Самат Аманшиннің әдемі пасынан кейін Рауан Исалиев нысананы дәл көздеді. Сол кезде кеудемізде үміт оты маздаған еді. Бірақ қайта қаһарына мінген Финляндия құрамасы тағы бес допты қақпамызға тоғытты. Есеп – 8:1.
Қазақстан құрамасы келесі кездесуін АҚШ спортшыларымен өткізді. Бұл бәсекеде жерлестеріміз айқын басымдық танытты. Біздің жігіттер арасынан Рауан Исалиев, Қуаныш Теміралин және Максим Утебалиев дубльдердің авторы атанса, тағы бір голды Петр Грибанов соқты. Америкалықтардың екі доппен ғана жауап қайыруға күштері жетті – 7:2.
Үшінші турдағы қарсыласымыз Норвегия болды. Әдетте бұл команданы еш қиналмай ұтатын едік. Бірақ бұл жолы ойсырай жеңілдік. Скандинавиялық бендишілер қақпамызға алты гол соқса, біздің жігіттер бір рет қана мергендік танытты – 6:1. Рауан Исалиев ұйымдастырған жылдам шабуылды Денис Максименко сәтті аяқтады. Топтық турнирдің соңғы сайысындағы қарсыластарымыз Швеция еді. Жарыс қожайындары қақпамызға жауапсыз 12 доп салды – 12:0. Қазақстан қола медаль үшін қайта Норвегия құрамасымен күш сынасып, тағы да ұтылды. Есеп – 1:5. Осылайша, аталған жарыс жерлестеріміз үшін сәтсіз аяқталды.
Өткенге зер салсақ, допты хоккейден әлем чемпионатының тұсауы 1957 жылы кесілді. Аталған жарыстың алғашқы тоғызы КСРО құрамасының жеңісімен аяқталды. 1981, 1983, 1987 жылдары Швеция командасы шашасына шаң жұқтырмаса, 1985, 1989 және 1991 жылдары қайта кеңес одағының ойыншылары үстемдік құрды. Одан кейін қызылдар империясы келмеске кетті. Осы күнге дейін 39 мәрте жалауы желбіреген жарыстың 14-і КСРО жеңісімен аяқталса, шведтер мен ресейліктер 12 мәрте алдарына жан салмады. Тағы бір дүбірлі дода Финляндияның жеңісімен аяқталды.
Дүниежүзілік додаға Қазақстан құрамасы 1995 жылдан бері үздіксіз қатысып келеді. Сол кезден бері алты рет қола медальға қол жеткізді. Алғашқы жүлдені 2003 жылы Архангельскіде алса, 2005 жылы Қазанда, 2012 жылы Алматыда, 2013 жылы Венерсборгте, 2014 жылы Иркутскіде және 2015 жылы Хабаровскіде сол нәтижені қайталады. 13 рет төртінші орынға табан тіресе, тағы екі жарыста бесінші сатыға тұрақтады. Өкінішке қарай, 2016-2019 жылдар аралығында ұйымдастырылған соңғы төрт чемпионаттан қоржынымыз бос қайтты. Ал 2020 мен 2021 жылдардағы жарыс жер-жаһанды жайлаған пандемияның салдарынан өтпей қалса, 2022 жылғы дода Ресей мен Украинаның арасындағы жағдайға байланысты кейінге шегерілді.
Өздеріңіз байқап отырғандай, бас жүлде үшін тартыс негізінен Швеция мен Ресей арасында өтеді. Ал қола медаль үшін сайыста көбіне-көп Финляндия мен Қазақстан құрамаларының жолдары қиысады. Бұл бәсекелерде жерлестеріміз алты рет жеңіске жетсе, Суоми елі өкілдерінің 11 мәрте мерейі үстем болды. Сондай-ақ біздің бендишілерді Швеция екі және Ресей бір рет қола жүлдеден айырды.
Қазақстан құрамасы сапында өнер көрсеткендер арасында мұзайдында жасындай жарқылдаған ойыншылар да аз емес. Мәселен, 2012 жылы Алматыда өткен жарыстың қорытындысы бойынша Андрей Рейн ең үздік қақпашы болып танылды. 2014 жылы Иркутскіде Александр Насонов ең құнды хоккейшіге тиесілі арнайы сыйлықты иеленді. 2018 жылы Хабаровскіде Рауан Исалиев мергендер көшін бастады. Оралдың допты хоккей мектебінің түлегі алты рет мұз айдынына шығып, 21 рет қарсыластар қақпасын дәл көздеді. Сол секілді әр жылдары әлемнің шартты құрамасына енген тағы бірнеше жерлесіміз бар.
