Дегенмен, кадрлық тапшылықтан арылудың жолы да, жөні де табылып, олқылықтың орны тола бастағаны қуантады. Президент жанындағы Мемлекеттік басқару академиясының Абай облысындағы филиалының ашылуы – соның айқын дәлелі. Семей политехникалық колледжінің ғимаратында орналасқан академия филиалының ашылуына қатысқан Абай облысы әкімінің орынбасары Шалқар Байбеков бұл бастаманың кадр мәселесін шешудегі маңызды қадам екендігін атап өтті.
– Өйткені облыстағы көптеген мемлекеттік қызметшілер, негізінен бұл салаға енді ғана келген жас мамандар. Академияда оларға білімін кеңейтіп, дағдыларын дамыту үшін үлкен мүмкіндіктер бар. Мұнда департаменттер мен басқармалардың мамандары дайындалады. Қазір мұнда 68 мемлекеттік қызметкер білім алып жатыр. Олардың барлығы қызметтегі мамандар. Бірден 17 түрлі ведомствоның қызметкерлерін табу мүмкін емес. Сондықтан кадр мәселесін шешуге жете мән беріп отырмыз, – дейді Шалқар Байбеков.
Жалпы, жаңа облыстың дамуына жауапкершілікпен қарау мемлекеттік қызметтегі сапалы кадрларды шыңдауға да байланысты екені түсінікті. Мемлекеттік қызмет істері агенттігінің облыс бойынша департаментінің басшысы Әділбек Мұқашевтың айтуынша, облыста 3,5 мыңға жуық мемлекеттік қызметкер жұмыс істейді. Филиалдың ашылуы олардың біліктілігін арттыруға, қайта даярлықтан өтуіне де жол ашады.
Облыс құрылғанға дейін семейлік мемлекеттік қызметшілер білім мен білігін арттыру үшін Өскемен қаласына шапқылайтын. Енді ол күндер артта қалды. Бұдан былай аудан әкімдіктерінде, басқармалар мен бөлімдерде қызмет атқарып жүрген мамандар облыс орталығы мәртебесін алған Семей қаласына келіп, Мемлекеттік басқару академиясының филиалында білімін жетілдіре алады.
Абай облысы
