Халықаралық «ATI.SU жүк тасымалы биржасының» хабарлауынша, өсімнің басты драйвері ресейлік бағыт болып отыр. Бұл бағыт бойынша өтінім саны 222 пайызға, ал баға 67 пайызға өскен. Мұндай динамика Беларусь бағытында да байқалады. Өзбекстан мен Қырғызстанға тасымал да айтарлықтай өсімге ие.
«Ресейлік бағыттағы өсімнің басты себебі – компанияларды сол елдің нарығынан кетуге мәжбүр еткен батыс санкциялары. Мұндай ахуал Ресеймен «достас» біраз елде байқалады. Бірақ Қазақстан Түркиямен бірге еуропалық тауарларды РФ-ға жеткізу бойынша негізгі тиеу бекеті болып отыр. Сонымен қатар тікелей Қазақстанда өндірілетін өнімдерге де сұраныс жоғарылады», делінеді хабарламада.
Өзге елдерден Қазақстанға тасымал бойынша қалыпты өсім бар. Былтырмен салыстырғанда өтінім саны 49 пайызға көбейген, ал баға мүлде өзгермеген. Есесіне сұраныс өсімі барлық бағыт бойынша тіркелген: Ресейден де (+45 пайыз), Қытайдан да (+63 пайыз), басқа еуропалық елдерден де.
ATI.SU мәліметінше, бірінші тоқсанда ел ішіндегі тасымал бойынша өтінім санының 3 есе артуына экономикалық өсім ғана емес, логистикалық жүйенің қайта құрылуы да себеп болған сыңайлы.
«Ауқымды өзгеріс кезінде көптеген компания байырғы серіктестерімен шектелмей, жаңа жүк тасымалдаушыларын іздеуге мәжбүр болып жатыр. Заманауи жағдайда мұны биржада жүзеге асыру тіпті оңай», дейді Халықаралық «ATI.SU жүк тасымалы биржасының» қазақстандық өкілдігінің директоры Рената Зобова.
Жақын келешекте негізгі үрдістер сақталады. Бірақ оған жаңалары қосылуы да мүмкін екен.
«Ресейлік бағытқа қарай тасымал өсімі баяулайды деп болжаймыз. Бірақ жаңа перспективалы бағыттар ашылады. Мысалы, пандемиядан кейін шектеулерді біртіндеп алып тастап жатқан Қытаймен серіктестік кезінде бірқатар мүмкіндік ашылып жатыр», дейді Р. Зобова.
